Ebby Schwengle: Aña 2022 ta uno exitoso aña pa Caribbean Arthritis Foundation

Caribbean Arthritis Foundation hunto cu director di Respaldo a tene un charla riba depresion, stress y dolor. Aki a splica con pa anda cu esakinan y con pa baha nan.

Hendrikus van Gaalen, director di Respaldo, a indica cu e charla teni hunto cu Caribbean Arthritis Foundation a bay bon. Van Gaalen a wak e entusiasmo cu e fundacion tin, esunnan na cabes dje fundacion a haci un bon trabou. E ta haya esunnan cu a presenta n’e charla tambe tabata hopi entusiasma. El a sigui splica cu nan ta open minded y su persona ta respeta esey hopi. E fundacion aki ta crece na e manera cu mester.

Director di Respaldo a sigui bisa cu e topiconan tabata riba e relacion entre depresion, stress y dolor. Tambe con pa conecta cu otro y kico hende por haci nan mes pa anda cu e trias aki, pa asina baha tur di nan. Menos stress y menos depresion, of menos chens pa haya depresion y un tiki menos dolor.

Caribbean Arthritis Foundation a organisa diferente charla. Segun Ebby Schwengle, secretario di Caribbean Arthritis Foundation, fin di 2022 ta yegando y na april nan a organisa e prome encuentro cu e pashentnan cu ta sufri di artritis of un di e formanan. Durante henter aña nan a haci diferente seccion di charla p’e pashentnan. E meta principal ta p’e pashentnan bini hunto y comparti loke nan tin, pero tambe con ta atend’e cu esey.

Diamars, 22 di november, e fundacion a organisa nan di shete charla. E charla aki tabata uno interesante y tabata presenta pa dokter van Gaalen, segun Schwengle. E charla tabata riba dolor, depresion y stress, y e pashentnan a haya un biaha mas e informacionnan valioso. Tambe con pa handle esey y p’esey e organisacion t’ey.

Pa mas lesa TREMPAN.COM.