Mildred “Mimi” Lampe a desaroya un problema serio cu pulmon e ultimo dianan aki. A kere cu lo por ta Covid-19 pero no ta esey. El a test tres biaha y tur a sali negativo. Asina mes su situacion a sigui empeora y awe marduga el a fayece. Pa hopi, mescos cu pa nos, e noticia a yega di sorpresa y yena di tristesa.
Juffrouw Lampe a educa miles di mucha den su carera. Por lo menos dos colega, Nelson “Speed” Andrade y Patrick Paskel a haya les di dje den 5de klas na Sint Domunicus College. Ta cord’e tambe como cabesante di Scol Basico Washington y despues a sigui den un funcion prominente na departamento di enseñansa. Semper el a dedica su bida na educacion di muchanan.
Na su ruman muhe Lissy, su ruman Maximo y na su demas famianan, nos ta expresa nos mas sincero condolencia. Cu Juffrouw Mimi sosega na paz.
