Tur cos ta cla pa e concierto bailabel di decada 80 y 90 caminda Miriam Cruz lo presenta cu su orkesta musical. E concierto lo tuma luga den Balashi Entertainment Arena.
E reina di merengue
Cu un sonrisa masha grandi Miriam Cruz a sali for di aeropuerto. El a comenta cu e ta masha contento di ta bek na Aruba. Na 2010 el a bin cu su agrupacion cu tabata mita hende homber y mita hende muhe. E ta cla pa canta y recorda tur e momentonan bunita. Miriam ta papia poco Papiamento pues el a laga sa cu “mi ta hopi bon”.
Cla pa un presentacion espectacular
Erin Croes, promotor di e evento, a comenta cu e artista t’ey pues e ambiente ta completo. Ta cu masha entusiasmo a ricibi Miriam Cruz. E promotor a laga sa cu Miriam ta mas cu cla pa duna un tremendo presentacion despues di 13 aña.
Manera pan cayente
Arthur Kelly, promotor di e evento, a informa cu e carchinan ta bayendo manera pan cayente. E carchinan ta bayendo asina bon cu no sa si ta resta pa bende na porta.
Tur hende ta preparando pa presencia un espectaculo musical. Miriam Cruz lo duna mas o menos dos ora di show. E concierto aki lo hiba un y tur den e añanan 80 y 90.
E bos di Chicas del Can
Erin Croes a informa cu Miriam Cruz a bin cu un entusiasmo pa recorda e añanan 90. Fuego, El Negro No Puede y Juana La Cubana ta e exitonan cu lo resona den Balashi Entertainment Arena.
E conciero lo ta un show inolvidabel. Carchi ta obtenibel na Hamaka Sidewalk, Vice Versa y na Gallo Rojo.
