Un rato pasa Minister Dangui Oduber, encarga cu maneho di Salubridad Publico, Turismo y Deporte a anuncia na 24ora.com cu e decision a cay pa emplea Gregory Croeze den e funcion di Director Financiero na Dr. Horacio E. Oduber Hospital, entrante dia 1 di april 2020. E ta tuma luga cu Theo de Kool a bay laga atras desde februari 2019 caba. Croeze tin un amplio experiencia caba na IMSan, aunke mas chikito cu Hospital, toch e conoce e industria di cuido.
Gregory Croeze a studia na Colegio Arubano y despues tambe na University of Central Florida, unda el a profundisa como “Master Business Administration”. E tin experiencia trahando na Aruba cu Deloitte y na PriceWaterhouseCoopers. E tabata tesorero na Aruba Excellence Foundation mientras cu awendia e ta den Hunta di Supervision di Aruba Ports Authority NV. Desde aña 2001, e ta den funcion di Hoofd Economische Administratieve Dienst na Instituto Medico San Nicolas (IMSan).
Dr. Horacio E. Oduber Hospital a organisa un solicitud habri pa e funcion y varios candidato a solicita, entre otro Gregory Croeze. Via un compania di Accountant y Advisory a scucha tur e solicitantenan y a presenta e miho candidatonan na e Raad van Toezicht y na Gobierno di Aruba. Den esey Gregory Croeze a resulta e miho candidato, den educacion, den preparacion pero specialmente tambe den experiencia.
Hospital di Aruba ta existi desde aña 1976 y su nomber ta na honor di e prome dokter Arubiano. Nan tin mas di 1000 empleado y ta atende mas di 16.000 pashent anualmente.
