Caribbean Wave su resultado mester mustra si Aruba ta cla pa atende cu un calamidad manera tsunami. Si esaki ta e caso, Aruba su nomber lo bay riba lista di UNESCO como pais prepara pa un situacion cu por surgi despues di un temblor.
Den un encuentro cu prensa prome cu e echo a tuma luga pa 11:00 di mainta, Rino Hermans, Director Crisis Management Office Aruba (CMO), a papia di e simulacro di un tsunami uzando e Early Warning System recien instala
E proyecto ta uno cu nan a bin ta trahando pa shete aña riba dje. El a splica cu prome cu por a bay na aplica pa e fondonan necesario pa ehecuta e proyecto di e sistema di alerta, mester a cumpli cu algun exigencia.
Loke cu a tuma luga diahuebs mainta tabata e Carib Wave, cu ta un training regional pa mira si Aruba ta prepara pa un tsunami.
Otro participante grandi den e simulacro ta e scolnan di Aruba. Segun Anuesca Baly, director di SKOA, nan ta participa cu tur nan 46 scolnan, cu ta nifica 8500 alumno y rond di 700 maestro / docente. Nan tur mester a bay na un punto di encuentro, unda cu lo conta cabes y mayornan por busca nan yiunan. Cada scol tin su plan di siguridad den cual ta specifica tur kico mester haci.
Cada scol a traha nan plan cu cooperacion di BRA cu awo ta CMO. Nan ta participando pa cuater aña caba cu e simulacro.
Prome minister mr. Evelyn Wever-Croes tambe tabata presente na e encuentro pa duna informacion prome cu e simulacro. CMO a haci hopi ultimo añanan riba e tereno aki p’e isla ta prepara. El a expresa e deseo cu Aruba por logra confirma na UNESCO cu nan ta cla pa atende cu un tsunami y poni di e forma aki riba e lista di paisnan cu ta cla, cu ta bin prepara. “E ta duna bo residente y bishitantenan un sentido grandi di siguridad.” Na final gobierno lo haya un relato cu ta bisa si Aruba ta prepara of no.
