Diamars, 25 di September, prensa y demas invitadonan tabata tey na Nicolaas Store, pa asina haya un tour di e Community Museum den su localidad nobo.
Ta trata aki di un museu cu a traha hopi aña riba dje. Un vision grandi cu e motor su tras, curator Renwick Heronimo.
Durante un rueda di prensa, medionan local a haya un bista di kico por ofrece den e museo aki.
Fundacion Museo Arubano ta consisti di tres museo, segun su directora, Anky Vrolijk. Museo Historico, cual tur hende conoce como Fort Zoutman, Museo di Industria cu ta ubica den e Watertoren na San Nicolas. E Museo di Comunidad cu ta ubica den Nicolaas Store, caminda cu e comunidad completo por haci uso di dje, por aprecia tur loke cu tin, pero tambe na e mesun momento haci uso di e parti di cafetaria, of e Mundi Health Cafe, cu nan por comparti cu e comunidad completo.
Vrolijk a sigui splica cu e enfoke semper ta riba localnan y turista. Tin cu haci e localnan e embahadornan prome. Mas cu claro e parti turistico ta e parti importante, mirando cu nos industria principal ta turismo. Idea ta cu lo acerca y a haci caba cu e museonan anterior, pa haci diferente tours. Ta traha hopi di cerca cu ATA y APA, pa asina crea un plan completo, no solamente pa e museo aki, y e otronan, sino pa tur e otronan cu lo bin na caminda.
Tur museo di nan propio historia y identidad. Importante pa bisa ta cu e museonan aki ta cay bao di Fundacion Museo Arubano, caminda cu e vision ta mesun cos, pero e integridad ta diferente. Vrolijk a agrega cu danki na e team completo cu ta maneha esaki y ta carga esaki, cu por bisa cu tin tres museo exitoso.
Presidente di directiva
Presidente di directiva di FMA, Lincoln Gomez a menciona cu riba e dia aki, prensa a haya un primicia di a haya un tour priva door di e curator, Renwick Heronimo, pa asina ey nan por siña un tiki mas di e producto cu a wordo poni eynan como museo.
Falta mas museo, segun Gomez. No tin suficiente museo. Ta trahando riba esey, el a agrega. Den e Museo di Comunidad por haya unda cu ta combina e balornan cultural, e balornan historico, cu den e caso aki di Nicolaas Store, ta poniendo nan hunto den un caminda cu den pasado caba tabata un punto central na San Nicolas, unda hopi hende tabata bin topa, papia, intercambia, tabata bay eynan y no tabata tin Whatsapp e tempo ey.
Treciendo e museo aki bek den e forma eynan, kier trece e caracteristica eynan bek, creando asina e posibilidad pa hendenan bin topa pa asina tene e storianan. Door cu ta rondona door di tur e artefactonan den e museo, por crea e posibilidad pa muchanan, pa hobennan, pa adultonan, tin un luga cu por intercambia riba esaki.
Fuera di tin artefactonan historico, tin artefactonan cu ta wordo produci pa nos artistanan local di awendia, unda cu ta combinando eseynan.
E mision ta pa tin mas hopi hende posibel drenta den e museonan, pa cera conoci cu nos pasado. Tin e trabao pa educa, pa informa, pa inspira tur hende cu drenta den e museo y ta realisa tambe cu kisas museo no ta e prome cos cu ta riba agenda di tur hende, den e dia pa dia. Si ta percura pa hinca tempo, dedicacion y promocion pa asina por logra esey, segun Gomez.
Por ehempel riba dianan di fiesta, manera 18 di Maart, Dia di Betico, ta caminda full e team di FMA ta labora, pasobra sa cu esey ta e dianan cu tin cu probecha pa haya e hendenan pa nan drenta den museo. Ta mustra cu e cifranan di e ultimo dos pa tres añanan, riba e dianan ey, un cantidad di hende, door di organisa actividad, door di promove y door di hincnan eyden, e cantidad di hendenan ta subi.
Cada biaha cu haya un hende mas pa drenta den e museo, esey ta yena e fundacion cu satisfaccion, Gomez a splica.
