E siman aki Aruba a conoce tres biaha mas caso positivo cu den henter e pandemia!

8588

Nos a habri e siman aki, dialuna dia 3 di augustus, cu 124 caso positivo pa Covid-19 y nos a cera e siman awe dia 8 di augustus cu 509 caso, pues un aumento di 385 caso nobo den un siman…esey ta por lo menos tres biaha e total completo desde cu Covid-19 a inicia na Aruba dia 13 di maart ultimo. No por mir’e di ningun otro forma, cu tin un brote local pisa andando, den cual ciudadanonan local mes ta contagiando otro, anto na escala grandi.

Di acuerdo cu e datonan suministra dor di Departamento di Salud Publico, DVG, ayera so a test 1030 persona. Tene cuenta cu den peak di Coronavirus nos a test un maximo di 90 hende pa dia. Awor aki e cantidad ey a surpasa 10 biaha mas hopi. Casonan activo a aumenta den un dia for di 279 ayera pa 392 awe.

E cantidad probablemente ta hopi mas cu locual nos tin awe como cifra oficial pasobra nos capacidad di test ta bou presion enorme. E demanda ta asina halto cu e laboratorionan sea no por maneh’e of no por procesa tur e resultadonan pareu. Asina por ehempel LabHOH ta haciendo test na Aeropuerto, dilanti Hospital mes, DVG na Diagnostic Center den Wilhelminastraat y Urgent Care na Noord. Na Aeropuerto ta keda cla cu resultado den 7 ora, mientras cu na LabHOH y DVG ta keda cla den mas o menos 12 ora. Urgent Care awo ta maneha resultado den 3 dia. Parce cu nan a pidi DVg y Hospital pa yuda nan cu test pasobra di nan a caba. No ta conoci con Gobierno lo haci, pasobra nan ta compania priva.

Debi na e brote di Covid-19 na Aruba, Departamento di Salud Publico ta haci un yamada na tur cuidadano cu den e dianan cu a pasa a test positivo pa Covid-19 y tambe na esunnan cu den e proximo dianan cu ta bin por test positivo ainda. E yamada ta pa mantene bo mes na tur instruccion di isolacion. Esaki nifica primordialmente keda cas y limita tur contacto cu otro persona lo maximo posibel. Unda no por evita e contacto, aplica tur medida di proteccion necesario.

Tambe ta importante pa bo alimenta bo mes bon, bebe hopi awa, maneha bo sintomanan y si tin cualkier pregunta of bo sinti cu bo salud ta empeora consulta cu bo dokter di cas. Esunnan cu tabatin contacto cu un persona positivo of tin duda, ta wordo conseha pa tuma tur medida di higiena y proteccion necesario y na prome indicacion di sintoma, tuma contacto cu Bo dokter di cas.

E dos lidernan mas grandi di nos pais tambe ta envolvi personalmente den e lucha contra Covid-19, Minister Presidente Wever-Croes tin su yiu Kevin infecta y ex-Minister Presidente Eman tin su sobrina Anouk Eman tambe infecta. Riba e foto di Kevin den Gusto algun dia pasa, por a mira nan tur hunto, mustrando cu enberdad Covid-19 no ta discrimina y no conoce color politico. Rib a e foto por mira claramente con AVP y MEP tabata hunto y a infecta hunto tambe!

Medidanan di higiena ta:
• Laba man frecuentemente cu awa y habon of uza handsanitizer
• Evita mishi cu bo wowo, nanishi y boca
• Evita aglomeracion di hende
• Mantene distancia di 1.5 meter di otro persona
• Bisti mondmasker unda no por garantisa 1.5 meter di distancia

Ta rekeri compromiso y disciplina di nos tur pa stop e virus di sigui plama.