Despues di a sufri poco contratempo pa loke ta e biahe pa un torneo internacional di baseball na Corsow, diahuebs ultimo e seleccion di Big League di Aruba a biaha pa nos hermana isla di Corsow unda nan lo competi na e asina yama “Clasico Internacional di Baseball Juvenil 2017”.
E torneo lo ta e dianan 22 te cu 29 di juli proximo. E seleccion ta bon prepara y lo duna e miho bataya contra e demas ekiponan participante. Esaki ta bira e prome edicion di e clasico di baseball cu lo conta cu e participacion di paisnan manera Corsow, Boneiro, Colombia, Mexico, Puerto Rico, St. Lucia y Republica Dominicana y Aruba. Lo bay tin dos poule pa despues hunga e kruis finale y ultimo e final. E organisadornan di e torneo clasico esta Curaçao Little League a tuma e bunita iniciativa pa cu e prome Clasico di Baseball Hubenil honra y dedica e torneo na 5 persona cu a contibui grandemente pa cu e desaroyo di e deporte di Baseball Hubenil na Corsow. E personanan aki ta srs. Gonzalo Cuales, Oswaldo Dulzaidez, Eithel Isebia, Carolus Antersijn i sra. Helen Ferdinandus.
Mester bisa cu siman pasa e seleccion di Big League tabata den duda si lo realisa e biahe pa e torneo na Corsow debi na falta di fondo, pero Minister di Deporte, Dr. Alex Schwengle hunto cu Lotto, e loteria di Aruba a percura pa pone e fondonan cu tabata falta pa asina e seleccion di Big League por atende e Clasico Internacional di Baseball Juvenil 2017 na Corsow. Representacion di un seleccion cu a prepara nan mes debidamente pa un torneo ta hopi importante y mas cu claro e ta un derecho pa nan por representa nos isla den exterior. Lotto di su banda kier a desea e seleccion di Big League tur clase di exito na e torneo Clasico Internacional di Baseball Juvenil 2017 na Corsow. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
