Recientemente Gobierno di Aruba a entrega e erfpacht pa De Veer Theatre por construi un Cinema nobo riba Sasakiweg otro banda di Pizza Hut. Despues di 3 aña di wardamento, MetaCorp, cu otro aña ta celebra 100 aña na Aruba ta cla pa inverti riba 30 miyon florin atrobe den economia di Aruba cu un cinema na nivel iMax. E lo bira e cinema mas moderno den e region aki, cu tur facilidad moderno y tecnologico.
E industria di cine tabata e prome negoshi cu famia de Veer a cuminsa na Aruba, pa despues sigui den refresco, heavy equipment y mas. A cuminsa e industria aki den cura di unda awo ta Censo Civil na aña 1920. Awo, e generacion nobo di e famia ta cla pa hiba e industria di cine pa e siguiente nivel di crecemento y innovacion. Aruba sin duda por ta orguyoso di e proyecto local aki.
