Problemanan den KIA ta sigui. Ta parce comosifuera cu awor tur atencion ta dirigi riba aspectonan di siguridad pa evita mas huymento, lubidando e parti humano ora cu ta trata e personal. Aunke cu a indica di lo busca mas trahado pa e prizon, e realidad ta cu e situacion a bira pio. Cuerpo Especial Arubano (CEA) a haya dos post mas paden, pero no tin hende pa traha. Consecuentemente e nivel di overtime ta hasta aumentando en bes di ta bahando.
E libertad di e trahador ta unicamente bay cas sosega, baña, bin bek. Ta pone hende traha 15 dia di overtime tras di otro. A hasta traha cama den toren pa e cuidadonan di preso por sosega. No tin supervisor pa controla esunnan den toren. E WC den toren ta hole stinki y ora di flush mester ranca pida kabel pasobra e no ta un WC normal mas. E parti di infrastructura ta malo pero mester mira tambe e parti humano.
Tin un grupo previlegia cu ta traha paden so den airco. No tin un rotacion igual den CEA. Tin hende cu no tin LB pa funciona como hefe pero ta pone nan traha como hefe. Si algo pasa ta haci e persona responsabel?
E trahadonan na KIA ta traha bou stress. Ta papia cu ta manda hende traha tambe na KIA pero ki dia? Mas cu 10 aña pasa caba a papia di baha e overtime na KIA pero te awe esey no a sosode. Ta pone tur tipo di regla sin consulta pa e trahadornan. Regla ta wordo cambia pa minuut sin consulta y na beneficio di un grupito. Ta bon pa Gino Winklaar mes bay haci investigacion con CEA su personal ta trahando.
Mester bin cu camara den toren. Tin varios stul den toren y nan lomba ta kibra pasobra ta uza nan pa drumi pega banda di otro. Esnan cu ta traha overtime ta stroba trahadornan nobo di bin. Ta hopi empleado cu ta cana traha cu hopi dia extra den nan salario. Ta forsa hende traha overtime pasobra nan no tin liber. Un hende por wanta tres dia trahando 16 ora overtime. Despues ta bay AO pasobra no por traha asina tanto overtime sin por haya liber. Den pasado hasta den dia cla tin preso a huy. Ta hopi cos e minister kier sconde y purba manipula den media pa tapa e realidad na KIA, asina trahadonan a expresa.
