Awe Cuerpo Policial Aruba ta anuncia cu Sr. Vianney Coffie un polis no desconoci den nos comunidad lo participa den IronMan 2018. Vianney Coffie ta forma parti di e unidad canino miho conoce como (K9 UNIT) di Cuerpo Policial Aruba.
Tur cos a inicia na e comienso di e aña aki ora ela participa den Ronde van Aruba. Esaki tabata e comienso di un hazaña cu awe e ta bai participa na Iron Man na Colombia.
Despues cu e exigencia di Scol di Polis tabata halto den loke tabata deporte, esey a motiva Coffie pa duna 100% di su parti den deporte pa asina e por termina y haya su MBO diploma di polis. E no por a hacie su so. Hunto cu su coleganan di klas nan a yude y pushe pa asina e pone su mente dirigi pa logra su metanan. Ora ela wak cu nada ta imposibel, ta di e momento ey ela wak cu un carera nobo lo inicia su dilanti. Ela hinca su mes den deporte no solamente pa e parti fysico pero mentalmente tambe pa asina e por yega final na cada evento deportivo.
Iron Man 2018:
E Iron Man lo tuma lugar na Colombia.Ta trata aki di un version chikito cu yama 70.3 cu Coffie lo participa. E ta incera 1.9km di landamento, 90km di bicicleta y un half marathon di 21km na pia. Bryan Lampe ta un un di so sostenedornan cu a pushe pa cu awe e ta bai pa e di 2 hazaña cu ta e Ironman. Coffie mes a haci su sondeo y a constata cu na Aruba, Boneiro y Curacao no tabata tin niun agente policial cu a yega asina leu pa den e evento di magnitud asina aki. Coffie lo ta e prome agente policial di Aruba cu lo participa den e evento aki cu lo carga Aruba y KPA den exterior.
E aña aki Coffie a atende diferente evento deportivo. E motivacion lo sigui y Coffie su meta principal ta pa completa e Ironman 2018 completo. Coffie a viaha caba pa Colombia pa Ironman 2018. Tabata 6 luna di preparacion y awor e dia a yega. Diadomingo awor dia 2 di december 2018 lo tin e competencia y Coffie ta cla pa participa y ta mentalmente prepara. Nos di Cuerpo Policial Aruba ta sumamento agradeci na Coffie pa su lucha y transformacion. Un agente policial cu ta duna ehempel pa e siguiente generacion. Nos ta desea Vianney Coffie hopi exito na Colombia y semper sigui preservera y guia e hobennan cu ta esnan cu lo guia e pais aki mayan.
