Diamars mainta tempran a drenta e noticia cu e ex politico John Merryweather a fayece.
Merryweather tabata e prome persona nombra como Minister Plenipotenciario na Den Haag durante e prome Gabinete Henny Eman, for di 1986 pa 1989.
John William Merryweather a nace 25 mei 1932. E tabata e prome Minister Plenipotenciario di Aruba na Den Haag y e prome representante di Aruba den Conseho di Minister di Reino di Reino Hulandes.
Bida
Merryweather, yiu di un tata Britanico y mama Arubiano, a bishita scol secundario na Jamaica y Reino Uni. El a studia na Universidad di Loughborough na Reino Uni y despues na Merca, unda cu el a specialisa den arkitectura panoramico.
Su carera a cuminsa na 1952 cu un funcion den sector petrolero. For di 1961 te cu 1975 e tabata hefe di Plantsoendienst di DOW na Aruba y Corsou. Na 1974 el a bay traha como coordinador di proyectonan special pa Bestuurscollege di Aruba. For di 1978 el a bira miembro di staff di Oficina di Turismo di Aruba y despues a drenta servicio di Gobierno pa bay traha na Antillenhuis na Den Haag.
Na 1983 el a uni su mes na PPA y a fungi como Secretario General di e partido for di 1983 pa 1984. Despues di eleccionnan insular el a bira miembro di Eilandsraad pa PPA pero dia 14 di mei, 1984 a tuma retiro. Entrante Status Aparte di Aruba, prome di januari 1986, Aruba a haya su mesun representacion na Den Haag, apart di Antillenhuis.
Den formacion di e prome Gabinete Henny Eman a nombra Merryweather, den nomber di PPA, den e puesto di Minister Plenipotenciario. Dia 13 di januari, 1986 el a huramenta dilanti Gobernador Felepito Tromp. Apesar cu na januari, 1987 e Gobierno no tabatin confiansa mas den e Minister di PPA Benny Nisbet, John Merryweather a keda den e funcion cu apoyo di AVP.
Despues cu su periodo como Minister Plenipotenciario a finalisa na 1989, el a keda nombra como hefe di “Arubaans Verkeersbureau” na Europa cu su oficina na Arubahuis. Den e eleccionnan di 1989 el a uni su mes na e partido nobo PPN como lider. Despues di algun aña el a bolbe Aruba.
Pa algun tempo caba John tabata interna den un Cas di Cuido.
Na su famia, ta bay palabra di condolencia.
