Aña 2020 a celebra Carnaval number 66 y tawata e ultimo Carnaval cu nos a celebra engrande manera nos ta custumbra. Nos tur ta corda e paradanan, e eleccionan y eventonan fantastico cu a tuma lugar. Na 2021 lamentablemente esaki no por a sigui y mesun cos awor den 2022.
Si mester bisa cu nos ta den pleno preparacion pa un Post Pandemia ‘Carnival celebration’ cu lo por keda anuncia pronto cu un fecha na esaki. Mundo a pasa y conoce loke nunca nos generacion a biba cual ta e pandemia cu a azota mundo henter, pues ta mayoria carnaval na mundo mester a para unrato.
CARNAVAL VIRTUAL a nace.
Despues di a pensa y sinta brainstorm a bin e idea cu apesar cu no tin eventonan grandi manera nos conoce, pa yuda crea e atmosfera carnavalesco via Radio y Facebook enbibo y dedica esaki na tur Carnavalista.
Ta pa e motibo aki tambe cu MAGIC 96.5 FM manera semper tumando rienda a anuncia cu apesar cu no tin e eventonan custumbra, a bini cu e idea pa lansa algo pa crea un ambiente nobo y habri un Plataforma di show radial y facebook, pa por papia di e tema di carnaval den tur su aspectonan. For di e cosedo, welderdo, musico, reina, participante y mas. Asina e programa nobo CARNAVAL VIRTUAL a nace eora ey, manera directora Erin Croes a comenta. A anuncia esaki ya for di principio di aña y esaki a realmente cay den hopi bon tera serca Carnavalistanan di curason.
Premio gordo tambe di 3000 mil florin Cash pa crea e jingle nobo di MAGIC FM!
Semper nos ta papia di mantene cultura di carnaval bibo, pues esaki ta un di e gran e formanan. Trese personanan cu conocimento di e tema, cu ta actornan tambe cu experiencia pa conta pueblo di carnaval. Mas cu claro banda di e combersacion, entrevistanan, lo tin competencianan virtual manera e buskeda di e JINGLE NOBO CARNAVALESCO 2022 pa e emisora. A anuncia un premio gordo tambe di 3000 mil florin CASH, cual ta danki na tur esnan cu ta inberti den e emisora unico aki.
Un palabra di gratitud inmenso na Señora Irene Vd Linde di Laboratorio familiar cu un aña mas ta apoya MAGIC y e team di Carnaval Virtual pa por bay den aire. Alaves ta gradici Final Format di Mitch Almary pa e creacion di promocionan fantastico y tur nos amigonan den comercio cu tambe semper ta kere den e magia di Radio Magic FM. Henter e team di MAGIC FM y coolaboradornan pa haci esaki un realidad virtual.
Presentadonan
Nos tin e placer di anuncia cu e presentadonan lo ta Cherryldine Buckley conocido personahe di carnaval como participante hopi aña den grupo manera Esso Club, Coastal Carnival group, Champagne CG, e ta presentado di TV y radio, pues tin amplio experiencia riba e tereno. Elsa Krosendijk cu ta creador di varios speech pa reinanan, prepara prins y panchonan, Sra Carnaval 2001 y participante active den nos paradanan. Maiky Oliva no ta un cara desconoci den e mundo musical como Mighty campo, participante y ganador di Roadmarch contest, cantante y presentador di Show radial, Mc e.o. ta esnan encarga pa haci e show uno yena cu musica, informacion y ambiente riba e diaransonan.
Dianan cu lo ta den Aire
E show lo ta tur Diaranson entre 6:00 PM pa 9:00 PM, Diahuebs mainta cu un resumen di e carnaval virtual y e musica di throwback Carnavalesco pa 10:00 AM cu Erin Croes y Diabierna mainta entre 10 – 12 di merdia cu Maicky Campo.
Oyentenan por spera un dushi ambiente Live riba Radio como tambe virtualmente riba e pagina MAGIC 96.5FM ARUBA live. Lo tin invitadonan, lo tin pregunta cu premionan campeon. E show lo ta start Diaranson Januari 26 pa seis or di atardi. Bo tambe ta invita pa joine ambiente virtual cu lo ta sensacional.
