Diabierna atardi Minister di Turismo, Salubridad Publico y Deporte Sr. Dangui Oduber tabata presente na e pier di Spaans Lagoen. Tabata riba 13 di November cu e mandatario a haci anuncio cu e pier lo wordo restaura, awe esaki ta un realidad.
E invitadonan presente e atardi aki tabata entre otro Directiva di Fundacion Centro Pesca Hadicurari, miembronan di prensa y e piscadornan cu ta haci uzo di e pier. Den un ambiente ameno Minister Dangui Oduber a hiba un discurso memey di hopi caranan contento. Den e discurso e mandatario a yama danki na Fundacion Centro y Pesca Hadicurari pa nan contribucion cu e bunita proyecto aki.
Pa varios aña caba e pier na Spaans Lagoen ta den un estado deplorabel, tabata 5 aña pasa cu Fundacion Centro Pesca Hadicurari a haci un peticion pa drecha e pier na e Gobierno anterior pero esaki a wordo hinca den lachi. Minister Oduber si a wak e importancia y a cumpli cu e deseo di e piscadornan, di e forma aki Gobierno ta duna atencion debido na nos piscadornan.
E restauracion aki a keda realisa conhuntamente cu Fundacion Centro Pesca Hadicurari. E homber chikito tin e atencion di Minister Oduber, piscamento ta un profesion humilde cu ta pone pan riba hopi mesa akin a Aruba. Awor cu un pier den bon estado mas piscador por maranan boto bek cu e trakilidad cu nan boto lo ta protegi.
Finalmente Minister Dangui Oduber kier a felicita pueblo di Aruba y muy especial e piscadornan cu ta bay haci uzo di e pier, mission cumpli! E mandatario a termina deseando un y tur presente un feliz dianan di fiesta.
