Tur documentacion cu ta prueba cu Evelyn Wever-Croes tabata sa masha bon kico tabata e reaccion cu Hulanda tabatin riba e peticion aki. Evelyn Wever-Croes sa masha bon kico el a haci durante e ultimo añanan cu a pone Hulanda ta teniendo na 12.6%.
Loke Evelyn Wever-Croes a haci na momento cu su partido a tuma rienda di pais Aruba, a pasa e presupuesto dje gobierno di AVP cu 100 miyon florin. Mike Eman, lider di fraccion AVP, a splica cu CFT a splica cu tin un escasez den e presupuesto. E presupuesto di 2018 di MEP ta mas halto cu e realisacion. No ta simplemente e cifranan di presupuesto, pero ya realisa, conta y calcula. Tambe a sigui indica cu el a subi cu 97 miyon y CFT a constata cu nan no a cumpli cu e afspraaknan haci.
Wever-Croes a haya un menasa dje ‘aanwijzingen’ y a core traha un rapport yama BVP, cual ta un beleidsplan pa reduci e gastonan di personal di gobierno. El a entrega esaki na Hulanda, y bisa cu e ta bay tin un ‘bezuiniging’ rond di 51 miyon florin. E prome minister a bisa nan cu pa aña lo tin un reduccion den gasto personal na 2018 di 12.2 miyon. Pa 2019 un reduccion di 11 miyon, 2020 un reduccion di 9.9 miyon y na 2021 un reduccion di 14.8 miyon. En total esaki ta riba 50 miyon, pero e mandatario no a haci nada cu beleidsplan. Segun Eman, pa por a ehecuta e plan aki e mester a termina contract di esunnan cu no ta AVP. Esunnan cu ta AVP el a core cu nan den e prome siman di su gobernacion. E lo a mira esunnan cu ta den pension y ainda tin un contract, a termina nan. Y asina tin mas.
AVP tin dos carta y Evelyn Wever-Croes simplemente a gaña e sindicatonan, a gaña empleado publico, a gaña pueblo cu e ta bay puntra Hulanda e permiso pa haya e 12.6% bek. Mientras e sa kico CFT a bis’e den dos carta, cual uno ta data dia 1 di december 2020. CFT a bis’e cu e 12.6% a baha costo pero esey no ta e palabracion y e mester mantene na dje. Kiermen e mester a reduci e costo di personal di gobierno. E reduccion dje gastonan realisa no a bin di e beleidsplan cu Evelyn Wever-Croes a priminti. Pero el a bin a base di cortamento di 12.6%, cual Hulanda no a bisa pero e mandatario mes a bini cu ne. Na november CFT ta bolbe trece e punto dilanti cu no ta mira e reduccion di personal, pero si e 12.6%.
Eman kier sa cu ki cara, ya cu el a bin cu e 12.6% cu a reemplasa esunnan priminti den e beleidsplan di reduci gasto personal, ta bay puntra Hulanda pa duna e 12.6% bek si no a cumpli cu e plan entrega. P’esey por a mira Knops rabia y bastante dicidido tambe pa bisa Wever-Croes cu loke el a pidi ta algo imposibel.
Pa un cobertura mas amplio lesa e edicion di TREMPAN di mañan.
