Miembronan di e Team di Resfuerso y Brigada di Cacho, BOT-K9, di KIA a traha duro durante ultimo simannan preprando pa vakantie grandi. Durante vakantie grandi nan a haci diferente presentacion y duna diferente demostracion na e hubentud rond di Aruba.
Riba peticion di maestronan y di guiadornan di e diferente lugarnan cu ta ricibi muchanan despues di scol, a percura pa organisa encuentronan di informacion na e.o. Scol Preparatorio Tarcicius na Mabon, Pastoor Kraaiwinkelschool na Paradera, Santa Rosa college na Oranjestad, Cool Kids na Boegoeroei y BMX Fun Club na San Nicolas.
Dependiendo di e edad, a duna informacion riba un gran cantidad di topiconan. E muchanan mas jong a haya un splicacion di cuido di cacho, con pa bo ta un doño di cacho responsabel y kico tur bo por siña un cacho. Mientrastanto, e muchanan mas grandi a haya informacion di uzo di droga, e trabou di un cacho special pa listramento y un cacho di vigilancia. Tambe a papia riba bida den KIA y trahando den KIA. A termina tur presentacion cu un demostracion de e cachonan pa listra y di atake, unda e Cocker Spaniel-nan Noa y Saar a resulta di ta esunnan favorito cerca e muchanan.
E encuentronan informativo y di demostracion pa scolnan y tur organisacion/instancia cu ta ricibi e muchanan despues di scol ta algo los di e tarea primordial di KIA. Esaki KIA ta balora masha hopi mes pasobra na e manera aki nan ta haya un oportunidad pa aporta na e formacion di e hubentud di Aruba.
