Parlamentario, drs. Mervin Wyatt-Ras durante conferencia di prensa semanal di partido AVP a trece padilanti cu gobierno ta carece na vision pa loke ta nos grandinan y nan necesidad.
Despues di presenta un ley y haya sosten di Parlamento di coalicion pa kita e reparatietoeslag pa cierto grupo di entrada, e minister ariba su mes a dicidi pa no tene cuenta cu ley y paga e suma aki di reparatietoeslag. Dicho toeslag originalmente gobierno di AVP a introduci. Awor gobierno ta duna AVP razon pa paga reparatietorslag.
Dia cu a bulldoze e ley aki na fin di anja, fraccion di AVP a presenta un amienda pa no kita e reparatietoeslag sin embargo parlamentarionan cu ta sostene e coalicion a vota en contra di e amienda y awor e minister ta bin cu otro decision ariba esey y pues no ta cumpli cu loke e mes a bulldoze y cu su coleganan na sonjo a sostene. Kizas na momento cu fraccion di AVP a trece e amienda padilanti tampoco no kier a duna credito na fraccion di AVP. Wyatt-Ras ta haya positivo cu nos pensionadonan ta keda ricibi e suma aki cu AVP a otorga nan tempo di gobernacion di Gabinete Eman. E preocupacion cu ta surgi ta di unda ta bai saca e placa aki bek pa e gobierno aki por cumpli cu loke nan a palabra cu CFT. Paso e gobierno aki di un banda ta haci comosifuera nan ta social y ta presenta un plan social pa esnan den dificultad y di otro banda ta bin cu medidanan cu ta afecta y corta profundo den esnan vulnerable den nos comunidad.
Wyatt-Ras ta trece padilanti cu ora bo drenta un supermarket tur hende ta keha. Esnan cu tin menos den nan cartera awor en bista di tur medida no ta “kom rond” mas cu esaki. Prijsnan di comestibles a subi drastico. Pa colmo gobierno a bulldoze un ley promer cu pasco entre otro pa comerciantenan no pone loke nan ta cobra na BBO mas riba recibo, sino nan ta haya boet. Esaki lo haci cu ta bira intransparente cuanto e consumidor ta paga na belasting riba productonan. Esaki ta un abuso dirigi na nos pueblo.?Wyatt-Ras y su fraccion ta desaproba esaki y ta di opinion cu mester kita tur otro medida cu gobierno a tuma riba nos pueblo. Dicho placa no ta bai pa paga Mega Debe manera e gobierno aki kier laga nos pueblo kere sino pa paga Mega Gastonan di luho di gobierno y su friends and family. Esaki tanto Raad van Advies como CFT tambe ta indica cu envez cu gastonan a baha nan a subi. Gobierno a tuma varios medida pa complace cu CFT, sin embargo awor cu gobierno lo paga e reparatietoeslag na pensionadonan nan lo busca e placa aki di otro forma y lo saca e placa aki for di nos mesun pueblo na un otro forma.
Paso CFT sigur lo pone presion ariba gobierno pa pone e suma aki bek den presupuesto. Ta nos hendenan lo tin cu bolbe entrega. Nos hendenan ta fada di e situacion aki. Gobierno envez di yuda nos hendenan pa sobrevivi diariamente cada biaha ta keda corta den nos hendenan. Esaki no ta un sitiuacion justo u ta in abuso. Esnan cu tin cu traha duro y esnan cu ta biba di un salario minimo no ta “kom rond” mas cu e salario aki. Nan no ta resta suficiente medio financiero pa paga gastonan y actividadnan pa nan famia y nan yiunan, paso tur comestible y otro producto a bira mas caro, incluyendo awa y coriente. Loke ta inhusto ta ademas cu e placa cu ta kita di nos hendenan no ta ser inverti den paga debe manera cu gobierno ta ganja nos hendenan sino pa paga pa Mega Gasto pa cumpra productonan di luho pa gobernantenan manera viahenan lucrativo, autonan di marca ultimo modelo y caro y poniendo famia y amigonan na trabou y hasta den puestonan clave. Recientemente un colega di fraccion di AVP a presenta un bista di e tantisimo viahenan di ministernan di coalicion cu casi no ta para na Aruba.
Tur hende ta ripara cu den e gobierno aki tur cos ta smal pa pueblo y hancho pa gobierno y su famia y amigonan. Placa di pueblo ta bai pa gozadera di gobierno y esnan rond di dje. Nos di AVP ta para banda di nos hendenan cu anterior tabatin un mihor bida y unda cu nos pais no tabatin mucho diferencia entre esnan rico y pober y cu por a yama nos hendenan hasta “verwend” pasobra nos hendenan tabatin placa den nan cartera pa gasta, sin embargo e medidanan a afecta nos hendenan masha hopi mes. Gobierno aki mester stop di ganja cu ta paso gobierno anterior a haci debe nan tin cu tuma medida. Paso e gobierno aki no ta pagando debe sino ta gastando placa sin limite. Wyatt-Ras ta wanta su curazon pa mas medida y pa a subida di accijns cu lo afecta nos turismo. Ya turistanan ta keha cu Aruba ta caro y dor di sibida di accijs riba alcohol, hotelnan lo bira mas caro, aunke nan lo busca nan productonan di exterior y esunnan cu lo ser perhudica ta nos comerciantenan local. Tambe restaurantnan lo sufri unda cu nos hendenan local cu tin restaurant lo no bai sobrevivi manera antes.
Segun drs. Wyatt-Ras gobierno di coalicion tin cu “bezin” of refleha y organisa un “retreat” pa nan pa wak kico nan ta haciendo cu nos pais. Gobierno mester refleha pa wak kico berdaderamente ta haci pa hisa calidad di bida di nos hendenan. Nos hendenan mester ta central. Gobierno mester “walk su talk” y pone nos hendenan, tambe esnan den necesidad na promer lugar envez di famia y amigonan.
