Home » E fundacion 131 hunto cu Pan American Development Foundation a estrena e ‘short movie’ ‘My Story’

E fundacion 131 hunto cu Pan American Development Foundation a estrena e ‘short movie’ ‘My Story’

by irnoelis

Ariba diabierna 28 di juni ultimo, den un sala completamente yen,  131 conhuntamente cu Pan American Development Foundation a estrena e short movie ‘My Story’.

Desde luna di maart e aña aki 131 a start cu implementacion di e proyecto ‘My Story’. ‘My Story’ ta un proyecto cu ta stimula empatia entre hobennan local y migrante, y asina aki trata di disminui discriminacion y xenofobia.

Danki na fondo proporciona door di e Bureau of Population, Refugees, and Migration (BPRM), 131 conhuntamente cu Pan American Development Foundation por a cuminsa cu implementacion di ‘My Story’ den 2024.

Na ‘My Story’ a participa 8 hoben local y 8 hoben migrante. E grupo di hoben migrante ta consisti di hobennan naci na Colombia, Haiti y Venezuela. ‘My Story’ a consisti di 6 sesion den cual e hobennan a siña tocante Derecho di Mucha, Igualdad, creacion di arte y actuacion, a crea un pintura y a crea y actua den un ‘short movie’.

Durante sesion number 2 e hobennan a bishita e hogar di otro. Durante e bishita aki e hobennan a siña conoce otro y otro su famia. Tambe nan a intercambia di informacion tocante cada un su cultura. E bishitanan aki a crea un amistad bao di e hobennan pa cu otro. Nan experiencia durante e bishitanan ta e inspiracion pa cu e ‘short movie’. E ‘short movie’ a wordo skirbi y actua pa e hobennan mes. Den e ‘short movie’ ‘My Story’ e hobennan ta ilustra con nan ta desea pa nan hogar ta, y simultaneamente con nan ta desea pa e hogar Aruba ta.

Durante e estreno di e short movie a hiba palabra e director di 131, e ‘program manager’ di Pan American Development Foundation Aruba & Curacao y prome minister di Aruba. E estreno a tuma luga den e  IMAX Auditorium na The Movies @ Gloria.

Despues di e estreno di e ‘short movie’ a tuma luga un exposicion di e pinturanan cu cada un di e hobennan a crea. Cada pintura ta e storia individual di cada hoben. E publico presente a acudi na e exposicion cu a tuma luga ariba e gangnan na  The Movies @ Gloria.

Durante e exposicion e hobennan a duna e publico presente informacion tocante nan creacion, y pa medio di un ‘QR-Code’ añadi na e pintura, e publico por a ricibi e ilustracion cu su significacion.  

Pa mas informacion tocante  ‘My Story’ por tuma contacto cu 131 via nos website: 131.aw, facebook: https://www.facebook.com/aruba.131/, email: [email protected] of telefon 5886138/ 5884011. 

Bo por gusta tambe

24ora ta e website lider di noticia di Aruba. Nos ta provee ​​e ultimo noticianan, video, cobertura bibo y hopi mas.

Busca riba 24ora

Noticianan Mas Mira

Ultimo Articulo

© Headlines Group | Wilhelminastraat 19 Oranjestad, Aruba | +297 583 2424 | Designed & Hosted by (r2)motion by Renzo M

Adblock Detected

Please support us by disabling your AdBlocker extension from your browsers for our website.