E fecha 18 di maart ta ancra den historia di Aruba

Riba 18 di maart 1976 Aruba a celebra pa prome bes su dia nacional. Relaciona cu e fecha aki lider politico Betico Croes ta remarca den eilandsraad lo siguiente.

‘Señor Presidente, 18 di maart a wordo escogi pa motibo di e fecha 18 di maart 1948. E mester ta un dia di Aruba na unda tur conciudadano uni cu un sentimento y cu e mesun anhelo ta bay Wilhemina Stadion y bisa porfin nos por canta nos HimnoNacional oficial, porfin nos por hisa nos bandera oficial di Aruba.’

Riba 18 di maart 1986, exactamente dies aña despues, Aruba cu Henny Eman jr. como e prome Prome Minister di Aruba, Aruba ta celebra e realizacion di e soño di tres generacion.

A toca honor na e nieto di nos prome luchador pa separacion, e pionero den politica Arubiano, difunto Henny Eman sr., esta Henny Eman jr. pa habri aña nobo como e prome Minister Presidente di pais Aruba.

Despues di añanan di negocia Aruba a logra su deseo di tin un Status Aparte den Reino. Riba 18 di maart nos ta honra e politiconan cu a hiba e lucha pa nos Status Aparte, e 2147 personanan cu, cu nan firma a duna sosten na e mocion cu a wordo entrega na Conferencia di Mesa Rondo riba 18 di maart 1948 dor di Shon A Eman y e 95 firmantenan di e peticion di 30 di juli 1947. Lamentablemente Betico Croes ta fayece dia 26 di november 1986 sin nunca recobra conocimento di un accidente grave riba bispo di aña 1985.

Nos no mag di cambia historia manera nos kier. Historia ta parti esencial di un pueblo. Historia tey pa wordo pasa pa generacionnan cu ta bin. E lucha di Aruba su Status Aparte a lanta cabez ya na inicio di siglo pasa cu Henny Eman sr. na timon. El a lanta e pueblo di Aruba e tempo ey pa lucha pa su Aparte Status. E 2147 firmantenan ta prueba di esey. Laga nos recorda nan cu e honor cu nan merece. Esaki nos ta haci diadomingo dia 17 di maart proximo. Pueblo di Aruba ta invita pa ta presente na e ceremonia aki cu ta cuminsa for di 5’or di atardi na Plaza 18 di maart.