E dia cu Hooiberg bin abao

Riba un dia manera awe, 13 di october, Aruba a keda sacudi pa un awasero torencial, cu hopi strena y lamper. Hopi caminda a keda inunda y hopi cas a yena cu awa. Tabata net un poco despues di 3’or di marduga, habitantenan cu tabata biba banda p’azuid na pia di Hooiberg, a scucha un zonido duro. Y ora cu nan a sali bin pafo, nan a tuma nota cu un baranca di Hooiberg a haya bida y cu un poder feroz a traha un caminda cu a pasa door di un cas di adres Hooiberg 83.

E impacto tabata asina grandi cu e cas a keda destrui por completo. Den e cas tabata tin un persona atrapa. Sra. Frank di 43 aña, kende a keda sorprendi den su soño ora cu su camber a yena cu lodo y piedra for di e sero di Hooiberg. Tur loke e hendenan den vecindario por a haci, ta sinta wak hororisa con Hooiberg tabata cobrando su victima. Ta te despues di 8’or di mainta por a rescata e curpa sin bida di sra. Frank.

Sigur ta un dia cu nunca mas e hendenan den vecindario lo bay lubida y riba e tereno, caminda cu e cas tabata situa, nunca mas no a traha uno na su luga. Tur loke nos por mira awe, ta e matanan di kwihi grandi y barancanan gigantesco cu nunca mas por a move.

Prensa e tempo ey a cubri e suceso aki extensamente.

Naturalesa tin su maneranan misterioso pa manifesta y si nan topa cu un structura, unda antes tabata un pasada, un dia esaki lo habri caminda bek pa e pasada keda pasa. Ainda rond mundo, por mira casnan cu ta wordo traha na pia di sero, na Aruba no ta descarta esaki tampoco. Apesar di e peliger cu por manifesta, toch pa e brisa y pa e tera fertil cu tin eynan, hendenan ta keda traha cas apesar di e peliger cu ta reina.

Un danki ta bay na Aruba Weather Watch riba Facebook, cu a trece e informacion aki dilanti, hunto cu un compilacion di potret di Amigoe di Aruba, unda cu a sa di ilustra kico naturalesa por haci den su furia.