E di cinco detenido pa boto cu a sink caminda pa Aruba

3361

Polisnan di e ciudad Falcon, encarga cu investigacion di un boto chikito cu a disparce cu 16 hende durante nan biahe di Paraguana pa Aruba, a bolbe haci un detencion. Ta trata di un homber di 29 aña.

Den noticia publica, basa riba informacion di General di Brigada Miguel Morales, e detencion a pasa den caya Maparari sector Bobare di Coro, municipio Miranda, na momento cu e homber tabata cerca di su cas.

Segun e investigacionnan di Cuerpo Policial, e detenido tabata un di e tripulantenan y ta un di e sobrevivientenan di e boto cu a disparce. Na momento cu e homber a mira polis, el a purba di huy, pero durante un persecucion chikito a logra detene. E caso ta den man di Fiscalia XV di Ministerio Publico.

Ta trata di e lancha cu a sali for di costanan Venezolano dia 17 di maart, durante pleno inicio di e crisis di coronavirus. Segun declaracion di sobreviviente y familiarnan, e lancha tabatin 23 persona abordo, incluyendo mucha chikito. E boto a sink prome cu el a yega Aruba.  

E prome cuatro personanan deteni tabata: Alexander Refunjol, di 25 aña y capitan ddi e boto; Otilio Chiquito Maldonado, di  47 aña di edad y marino; Ricardo Aguillón, colaborado; y Wladimir Jesús Colina, un di e pasaheronan.  Remarcabel ta cu na Aruba tin un Refunjol cera den KIA condena pa traficacion di hende for di Venezuela.

E cuatronan ariba menciona ta acusa di trafico di persona, inmigracion ilegal y asociacion pa comete delito. Un biahe di e tipo aki ta costa entre 300 pa 500 dollar.

E sobreviviente y familiar di otronan abordo a bisa cu solamente cuatro persona a logra salba ora cu e lancha a sink. A base di declaracion duna door di e detenidonan por a saca afo cu e motor a daña y awa a cuminsa yena e boto cu a causa cu el a sink hopi lihe.

Algun di e hendenan a wordo rescata y a logra yega tera, mientras cu aki na Aruba tambe a menciona cu e mesun dia ey a detene algun persona haya abordo di un boto local. No a menciona si ta di e mesun caso.

Loke tambe ta conoci cu un poco mas cu un siman despues a haya dos curpa na un beach na costa Colombiano, Alta Guajira.