E di bintinuebe edicion di Ronde van Aruba

A pesar cu ainda nos ta den e pandemia di COVID, toch un cantidad grandi di persona, sea nan so of den grupo a sa di participa den e conocido Ronde van Aruba, cu a cuminsa den careda di 2:00 am y a dura te mainta.

Vocero di Defensie Caribisch Gebied, luitenant ter zee, Stefan de Haan a conta cu Ronde van Aruba ta un evento sumamente grandi organisa ya pa di 29 biaha. Aña pasa december a organis’e tambe. Na Aruba e ta un evento grandi.

E aña aki a participa un total di 660 coredo. Por lo general tin hende cu a core den un team (estafette). Tabatin 151 team. Pero tambe tabatin hende cu a participa nan so (8 persona) of den pareha (28 duo).

E di bintinuebe edicion di Ronde van Aruba

E di bintinuebe edicion di Ronde van ArubaClick link pa lesa mas: https://24ora.news/3pweJVn

Posted by 24ora on Saturday, December 4, 2021

E evento aki normalmente ta uno hopi grandi y cu ta yama hopi participante. Segun van Haan, mirando cu nos ta den un pandemia, e edicion aki mester a adapt’e tumando varios medida di prevencion pa tene un evento ‘COVID-vrij’. Aña pasa mester a anima e personanan pa nan por a participa den e evento aki.

Van Haan a menciona cu e coredonan so por a bin na kazerne. A purba lo maximo pa mantene n’e reglanan di COVID. Gobierno a bay di acuerdo tambe pa haci esaki.

A spera e prome coredonan pa 2:00 am. E Ronde ta un evento organisa pa Marinierskazerne na Savaneta. E inscripcion a habri for di februari caba y den un lapso hopi cortico di tempo a yega e luganan. E ta un evento hopi popular cu ta lanta sigur un entusiasmo cerca e atletanan local.

Tin un team completo sinta tras di e organisacion di e evento aki y p’e motibo aki tambe ta gradici nan, como tambe e patrocinadonan local cu a para tras di e evento aki manera tur aña. Sin lubida e publico cu tabata para y anima e coredonan na cant’i caminda.

Gezzamir Geerman (FBI on D Road – di Alive Running Team) ta un di e coredonan cu a participa den Ronde van Aruba y a comenta cu a logra un meta bao di seis ora, cual ta un record nobo p’e y su team e aña aki.

Tur cu a participa n’e team a duna di su banda. Geerman a train pa dos luna, despues cu e tabata afo pa seis luna. Loke e curpa a duna, a demostra riba e dia aki. E ta gradicido y contento y Dios na prome luga cu el a yega e finish sano y salvo.

Geerman a conta cu e aña aki el a haci miho compara cu aña pasa. Pero door di come bon y mantene un bon disciplina a yega leu.

Pa loke ta e training, nan a train riba nan mes. A bay segun instruccion di nan coach. Pa otro aña nan tin plan grandi pa Ronde van Aruba.

Por ta e lo bay duo otro aña, cual ta un meta cu e tin.

El a conta cu e trayectorio di Ayo pa Alto Vista tabata uno basta duro, ya cu tabatin varios subida. Pero na final a bay cu e victoria.

Geerman kier a gradici su coach Carlos Olivares cu a kere den dje. Su mayornan, cu cada biaha tabata puntra p’e. Tambe su team cu ta para su tras y tur su amistadnan, famia y fanaticonan. Ta gradicido na tur.