Bombero a activa pa candela den cushina

Diamars alrededor di 8:30 am, trahado di Ganikome situa den Wilhelminastraat 68, a bati alarma pa un candela den cushina di e restaurant. Bombero a yega mesora pa evita expansion y mas daño. Awor ta investiga kico ta locual a sosode cu a causa e candela aki.

Segun por a compronde, e trahado tabata ocupa cu e rutina di tur dia, pues a habri cushina pa cuminsa prepara pa merdia. E trahado femenino a yega mainta, habri gas, cende tur pilot di stove y tambe e fryer. Den e proceso di cende e fryer, a nota cu a crea un candela. 

E trahado a actua mesora y a cera e gas y bay pa pasa man p’e brandblusser pero ora cu el a yega bek pa uz’e, ya e candela a crece y bira grandi. Den un cera di wowo a mira con e candela a cuminsa expande y e luga tabata yena cu huma. 

Alarma pa candela den cushina di restaurant na Wilhelminastraat

Posted by 24ora on Tuesday, August 2, 2022

Polis y brandweer a yega cu urgencia na sitio pa combati e candela. E candela a bay te den e afzuigkap y dañ’e por completo. Trahado di DTI y alabes ELMAR a presenta na sitio pa atende cu e situacion y investiga causa di e candela y pa prepara un rapport pa evita ripiticion.

Presencia di Slachtofferhulp tambe tabata necesario pa atende cu e trahado femenino debi cu e susto tabata grandi.