Hopi a wordo skirbi caba di “Dunkirk”, e pelicula abromador yen di suspenso cu mi a mira siman pasa na Seaport Cinemas. Mucho mas lo wordo skirbi dia cu e pelicula ricibi tur e Oscarnan cu e lo gana merecidamente. Pero mi ta duda cu algo lo aparece den corantnan mundial di e conexion improbabel di e storia di Duinkerk y e isla di Aruba.
Na Aruba mes, mayoria di hendenan no sa cu hopi di e soldanan Escoces cu tabata staciona na Aruba di 1940 pa 1942 tabata sobreviviente di Dunkirk t cu nan a yega Aruba apenas tres luna despues cu e evacuacion na Dunkirk a yega na su fin. E 4th Batallion di Queen’s Own Cameron Highlanders bou comando di Coronel Colin Muir Barber tabata entre e evacuadonan di Duinkerk.
E Escocesnan a yega Aruba september 1940 pa reemplasa e soldanan Ingles cu tabata na nos isla desde februari di e mes un aña. Supuestamente nan a bin pa relaha y rehabilita prome cu nan bolbe bay frentenan di guera y e comunidad Arubiano a ricibinan calurosamente.
Coronel Colin Barber tabata midi 6 pia y 9 duim y tabata considera e militar mas grandi den ehercito Ingles. Ironicamente el a haya e apodo “Tiny”. No a tarda mucho cu “Tiny” Barber a forma amistad cu “Scotty” Barbour, un paisano ehecutivo di e refineria Eagle casa cu un yiu muhe di un di e comerciantenan mas prominente di Aruba, Señor L. J. M. “Nadie” Henriquez.
Un otro oficial di e grupo cu a forma amistad cu e comunidad Arubiano tabata Mayor Munro. Mayor Munro a introduci e wega hockey na nos isla y el a coach e ekipo di Club Caribe. Bou di su guia Caribe a bira e ekipo mas fuerte di Aruba y tabata gana te hasta e ekipo di e Escocesnan. Caribe tambe tabata gana e ekiponan di Corsow aunke e empleadonan Ingles y Hulandes di CPIM a importa hockey aya hopi aña prome.
Un diadomingo atardi ora mi rumannan y ami a sali di Zondagschool na Kerki Protestant den Wilhelminastraat, un grupo di mas o menos 50 solda Escoces a pasa marchando. Nan tabata tuma parti den un “wandelmars” di 15 km. Espontaneamente, mi ruman grandi y ami a dicidi di cana cu e Escocesnan y nan a mustra di ta contento di ricibi nos den nan grupo. Nos a combersa cu nan y nan a comparti awa di nan veldfles cu nos.
Despues di cana e ruta completo di Playa pa Balashi pa Santa Cruz y bek pa Playa nos tabata cansa, pero hopi contento y orguyoso di a cana tur e oranan cu e Escosesnan, e defensornan di nos isla contra cualkier atake Nazi. Poco mi por a realiza cu e Escocesnan tabata mes mal arma cu nan tabata na Duinkerk y den caso di un atake nan lo no por a haci absolutamente nada. Mi tabatin apenas 10 aña y inocente, pero mi ta corda e dia ey manera ayera.
E soldanan Escoces a keda Aruba te 13 di februari, 1942. E dia ey tropanan Mericano bon arma a yega Aruba y e Escocesnan a bay cu e mes bapor cu a trese e GI’s. Tres dia despues U-Boat 156 a ataka Aruba.
Coronel Colin Barber a wordo condecora cu e medaya di Distinguished Service Order (DSO) pa heroismo durante e evacuacion di Duinkerk y despues el a wordo promovi pa Lt. General pa su actuacion excepcional durante e batayanan di 1944-45 na NoordOost di Europa. Tambe el a ricibi un “lintje” pa compaña e medaya DSO pa indica un promocion den e orde.
Lt. General Barber eventualmente a haya condecoracion di Ridder Comandante den Orde di Imperio Britanico y a wordo nombra Companion den Orde di Bath. Sir Colin Muir Barber a muri 1964 na edad di 67 aña.
