Un proyecto cu a cuminsa mas di 2 decada pasa a duna su fruta. Un catalogo di tur e pinturanan Indjan riba baranca ta un realidad!

Miembronan di Directiva di Fundacion 1403, Eduard Dresscher, Julie Thodé, Sue-Ann Croes y Arminda Franken – Ruiz y co-autor arkeologo Harold Kelly di Museo Arqueologico Nacional di Aruba, a ricibi for di man di Cees Scholten di DrukCase e prome ehemplarnan. E demas copianan ta na caminda pa Aruba, cu un presentacion planea pa final di Juni.

Tur esnan interesa pa cumpra e publicacion aki nan por haci esaki via e link cu por haya riba e pagina Facebook di Fundacion 1403. Esnan cu bestel y paga nan buki prome cu 3 di juni proximo lo haya un prijs special di 80 florin y nan copia lo ta firma pa e dos autornan di e buki. Arkeologo y co- autor di e publicacion Dr. Aad Versteeg a peticion di Evelino Fingal, e tempo ey director di Museo Arqueologico, a cuminsa cu e proyecto di inventarisa tur pintura Indjan riba baranca na Aruba mas di 20 aña pasa. Aruba ta un di paisnan cu mas densidad di e tipo di pinturanan aki na mundo y e catalogo ta un instrumento pa promove proteccion di e herencia aki pa comunidad local y global.

Banda di un balor cientifico y pa investigacion, e pinturanan ta fuente di inspiracion pa creadornan y innovadornan di nos isla y di afor. Ya sea den obranan di arte, di diseño grafico, di artesania, den Carnaval y antes y awor tambe riba e biyetenan di nos florin, e pinturanan aki ta figura como un simbolo di identidad y maestria Arubano. Fundacion 1403 ta gradici e financiadornan di e publicacion, esta Prins Bernhard Cultuurfonds Caraibisch Gebied, UNOCA, Gomez en Coffie, FCCA y Grant Thornton Aruba. Un danki tambe na Ministerio di Finanzas, Economia y Cultura pa nan colaboracion. Danki na Nathaly de Mey di Taste my Aruba pa tabata anfitrion di e entrega di e prome ehemplarnan. Ta encurasha tur hende pa cumpra un ehemplar di e publicacion aki mas lihe posibel pasobra considerando cu ta un buki di mas cu 400 pagina, na color y cu un ‘hard-cover’ ta dificil pa haci un reimprenta den caso cu nan caba.

Comments

comments