E cantante Mexicano, Jose Romulo Sosa Ortiz, conoci den e mundo di espectaculo como Jose Jose, a fayece awe diasabra, dia 28 di september, na edad di 71 aña. Esaki ta segun Televisa, citando e asistente di e interprete, Laura Nuñez.
Segun el a trascende, Jose Jose, yama como “el principe de la cancion”, a perde su bida den un centro medico di e ciudad di Homestead, na Florida (Merca), como victima di un cancer di pancreas.
E artista a yega fama mundial na 1971 cu su interpretacion di “El Triste”, di Roberto Cantoral, den e Festival OTI.
Posteriormente, e hoben y talentoso cantante, a mira su popularidad crece cu exitonan na radio manera “Gavilan o paloma”, “Lo pasado,” “Amar y querer” of “Buenos dias amor.”
Cu mas di 250 miyon di disco na benta, e imagen y e voz di e artista a yega na oido di e publico, no solamente na Mexico y Merca, sino tambe na Europa y Asia.
Salud y adiccion
E voz di e talentoso interprete no a yega na aña 2000 den bon estado: alcoholismo y inyeccionnan di cortisol a daña su vocalnan y a diagnostik’e cu diabetes y efisema pulmonas pa e aña ey.
Un decada atras, sin embargo, el a haya e malesa di Lyme, pa motibo di un bacteria, loke a provoca un paralisis severo na e banda robes di su curpa cu a caba pa kita su capacidad pa canta.
Pa motibo di e bacteria aki, e interprete a sufri for di e tempo ey problemanan na su wowo, su laringe, faringe, un pulmon, stoma y intestinonan, debi cu el a confesa cu e tabata apunto di suicida den e decada di 1980.
Na maart di 2017 nan a diagnostik’e cu cancer di pancreas y na juni di e aña aki, Jose Jose, a laga sa na su sigiudonan cu e lo sigui cu su “terapianan pa sigui p’adilanti.”
