Cu hopi entusiasmo ta anuncia cu e di cuater buki di e serie “Bencho” a wordo publica dor di autor Olga Buckley. Manera ta conoci, Olga Buckley tin un trayectoria largo pa locual ta skirbi storia di mucha cu a cuminsa cu e prome buki di e serie, Bencho ta dual na aña 2004.
Prome cu esaki Olga tabata traha mas cu 40 aña como maestro den enseñanza y durante mas di 10 aña largo a dedica su mes na promove e importancia di lesamento pa medio di Fundacion Bon Nochi Drumi Dushi . For di diferente experiencia cu almuno y hoben, Olga a ricibi inspiracion pa su bukinan.
Den e cuatrilogia aki por sigui con un mucha homber di Aruba ta crece descrubiendo su mes, acompaña pa tur reto cu por imagina. Asina Bencho ta e storia di nos tur!
Un primicia ta cu e serie di Bencho ta e prome cuatrilogia na Papiamento. Keda pendiente pa buki 5 di e serie di cual e manuscrito ya ta completa. E gran crusada di Bencho ta apto pa hoben y ta skirbi den nos lega materno.
Tur hoben como tambe comunidad en general ta invita pa lesa E gran crusada di Bencho, awo obtenibel na e librerianan Van Dorp y Plaza Bookshop.
