E enemigo di nos bida y nos alma, kende ta loer di dia y anochi pa horta, mata y destrui (Juan 10:10) tin su bista fiha riba nos yiunan (hubentud) pa asina haci tur locual ta posibel pa nan no cana den e caminda di Dios. Pero pa nan ta rebelde, sin respet, inmoral, y hasta haci nan criminal den flor di nan bida.
Cuanto mucha no tin nan mayornan diariamente cu awa na wowo, den tristesa, den dolor, e muchanan cu diabel a bruha nan bida, cu en bes di mayornan bay baha nan na scol mainta, e mayor tin cu bay wak nan den prizon mainta. E cos aki no ta wega, e ta un dolor.
Ta un urgencia pa den tur cas, den tur hogar, nos muchanan mester wordo siña pa haci oracion. Pasobra un mucha cu ta haci oracion na Dios Tata todopoderoso den nomber di Cristo Hesus, Dios ta liber di problema y su mayornan di berguensa.
Un mucha cu ta haci oracion lo siña y haya sa cu Dios ta real y su fe lo aumenta den Señor (Mateo 6:9+10).
E mucha lo tin un relacion personal cu Dios cu lo stroba e diabel di gara su mente (Salmo 46:10).
E mucha lo siña cu Dios ta stim’e y cu Dios ta scucha y contesta su oracion (Juan 14:13-14).
E mucha lo siña cu contesta di Dios ta importante y unico (Jeremias 33:3).
Oracion lo siña nos muchanan cu ora nan haci un fout nan tin ayudo y pordon cerca Dios (1 Juan 1:9).
Un mucha cu ta haci oracion tin resistencia contra tur tipo di bully y presion di e malvado (Santiago 4:7).
Oracion ta siña nos muchanan cu tin consecuencia y pordon di pica, y cu solamente Cristo Hesus tin e poder pa redencion (Romanonan 8:28)
Pa medio di oracion nos hobennan lo bin haya sa cu Dios tin un plan y diseño pa nan bida (Jeremias 29:11).
P’esey ta deber di tur mayor pa tuma tempo na cas y siña nan yiunan haci oracion.
Tur mayor cu stima nan yiunan ta siña nan pa pone Dios na Prome luga den nan bida (Mateo 6:31-33).
Tur mayor cu stima nan yiu mester coregi y disciplina nan yiu den e amor di Cristo Hesus (Efesiosnan 6:1-4).
Confia den Señor cu henter bo curason, y no depende riba bo mes comprondemento.
Den tur bo camindanan reconoce Dios y e lo dirigi bo pasonan. No sea sabi den bo mes bista, teme Señor y aparta bo mes for di maldad (Proverbionan 3:5-7).
Locual e enemigo tin prepara pa haci cu muchanan na scol, ta solamente Dios por libra nan di dje pa medio di oracion, pa asina nan rechasa tur sorto di enseñansa inmoral y contra di e palabra di Dios cu por presenta nan dilanti.
Corda bon cu na scol nos muchanan no ta haya hopi enseñansa spiritual of nan no ta haya ningun orientacion pasobra ta hopi tempo caba cu Bijbel a wordo saca for di scol, esaki ta nifica cu tur mayor mester haci un esfuerso pa guia nan yiunan den caminda di Dios (Proverbionan 22:6).
Te hasta un mucha ta conoci pa su echonan si su conducta ta puro y recto (Proverbionan 20:11).
Siña cu tur diligencia, na bo yiunan y papia di nan tur ora sinta den bo cas ora bo ta cana riba caminda (Deuteronomio 6:7). No laga ningun hende desprecia bo hubentud,ma mas bien den palabra,conducta, amor, fe y puresa demostra di ta un ehempel pa esunnan cu ta kere (1 Timoteo 4:12).
Señor bendiciona nos hubentud.
