E bataya politico pa BBO riba recibo

E mesun Parlamento cu aña pasa den december a aproba e Reforma Fiscal den cual e asunto di elimina BBO riba recibonan, awor kier pasa un otro ley pa bolbe pone e impuesto aki riba recibo. Sea aña pasa Parlamento no a informa su mes debidamente prome cu aproba e ley, of presion comercial a domina algun miembro di Parlamento. Pa casualidad e bataya interno aki awor ta tumando luga den seno di e mesun partido na mando, esta MEP. Di un banda Minister Xiomara Maduro ta pusha pa implementa e cambio aki, mientras di otro banda Parlamentario Daphne Lejuez (ex Presidente di Camara di Comercio, awe ta pusha pa cambia e ley y laga BBO riba recibo toch. Cua di dos tin mas sosten entre e 12 miembronan di Parlamento cu ta sostene coalicion ta e gran pregunta.

No por keda sin menciona cu durante tratamento di presupuesto 2019 tabata precisamente e momento cu a atende cu Reforma Fiscal y ey a presenta e ley cu entre otro ta elimina BBO-BAZV-BAVP for di riba recibo. Por corda ainda cu e dia ey e mesun Parlamentario, esta Daphne Lejuez, a opta pa biaha pa Hulanda pa pasa vakantie cu su famia. Nos a cubri su baymento na Aeropuerto y e tempo ey dirigencia di partido MEP a yame y practicamente bahe for di avion pa e presenta bek na Parlamento. Kisas den e ansha pa vakantie a vota pa un ley cu e no tabat consciente di dje of a profundisa su mes mas riba e materia.

Si BBO ta aparece riba recibo of no, de facto, no ta nifica nada pa e consumidor. Si por ehempel un producto costa 100 florin den tienda, ora yega na caha, lo inclui 6 florin adicional riba e recibo y asina e cliente lo mester paga 106 florin pa e producto. Departamento di Impuesto, por medio di Minister Xiomara Maduro a opta pa elimina esaki y obliga e negoshi pa inclui e 6% den prijs di producto. Como tal, e cliente no lo mira un prijs riba “shelf” y paga un otro suma na caha. Gobierno ta sinti cu e ora e prijsnan lo ta mas transparente y evita confusion pa e cliente mes. E mandatario ta sali for di e punto di bista cu cobransa di impuesto ta forma parti di e structura di prijs di cada producto. Mescos cu e comerciante no ta inclui e gasto di fleta, seguro y su margen di ganashi riba recibo, no ta mira pakico pone e impuesto tampoco.

Un grupo den comunidad ta teme cu si no tin transparencia den prijs di producto, cu e comerciante lo por opta pa hisa e prijs di BBO mas cu djis 6% riba cada producto. Mester menciona cu Gobierno ta mira esey diferente, pasobra mas e comerciante aumenta e prijs, mas BBO-BAZV-BAVP e lo tin cu paga. Tambe e aspecto di competencia tambe ta hunga un rol pasobra su e otro tiendanan no haci mesun cos, e ora esun cu si a aumenta prijs lo perde benta.

Ora tipo di diferencianan fundamental asina riba un decision politico, hopi biaha ta pisa e poder basa riba cantidad di votonan. Mas voto un politico tin individualmente, mas sosten e tin probablemente den pueblo y como tal mas peso e tin den Parlamento y den partido. Den caso di Xiomara Maduro, el a participa den eleccion Parlamentario pa prome bez na aña 2009 y a haya 260 voto individual. E tempo ey el a asumi e puesto di Parlamentario pa Fraccion di MEP. Su popularidad a crece casi 10 biaha mas hopi den eleccion 2013, logrando no menos di 2445 voto riba su nomber y a sigui den funcion di Parlamentario. Den ultimo eleccion na September 2017, e candidata # 2 riba lista di MEP a haya 2696 voto. Di otro banda Daphne Lejuez, procedente di comercio, a participa solamente un bez como politico riba lista di MEP na september 2017 y tabata bon pa solamente 196 voto. De facto e ta e Parlamentario cu menos voto den e Fraccion di MEP y un di esunnan cu menos voto den henter Parlamento.

Mr. Evelyn Wever-Croes, siendo un Fiscalista y Hurista di profesion, awor tin un rol adicional di referee entre dos colega di dje, cu pa colmo ta su amiganan. Cada un para riba nan punto, pa un motibo of otro, siendo cu e profesional riba asunto di belasting ta e mesun Evelyn Wever. Ni Maduro ni Lejuez no tin e estudio of experencia cu leynan di belasting pa por domina un discusion asina. E prome mandatario, cu alabes ta lider di e di dos partido cu mas voto na Aruba, tin e tarea pa na un forma tactico, interveni y evita cu un diferencia di opinion politico den partido por resulta den un impasse cu posibel kiebro den Parlamento. Si Daphne Lejuez haya un colega den coalicion den Parlamento para banda di dje, e ora e ley lo pasa, speciamente si e logra den su intento awor pa “lobby” constantemente cu oposicion riba e ley aki.

Siendo un politico bastante activo riba red social, Daphne Lejuez casi diariamente ta haye den discusionnan publico riba e tema aki. E no tin miedo pa expresa su opinion, cu regularmente sa ta diferente cu esun di Gobierno. E ta boga pa tin discusionnan sano y cu e rol di Parlamento ta hustamente pa controla y supervisa Gobierno. Su primonan den comercio tampoco ta sconde nan opinion y diferencianan cune riba Facebook, cu regularmente ta haya masha atencion di otronan cu ta sigui e discusionnan aki di cerca. Lejuez a hinca su mes awor den un skina dificil pa sali ileso for di dje: Sin ningun duda sea e mes of e Minister cu e ta sostene lo sali cu daño di imagen for di e bataya aki.

Aunke cu nan no ta expres’e publicamente, ta conoci cu den seno di Directiva di Camara di Comercio, tin simpatia pa e cambio di ley di Daphne Lejuez. Biniendo for di e mesun seno ey, Lejuez tin contacto regularmente cu su ex coleganan y ta practicamente nan bos den Parlamento. E forma con Minister di Finansa y Asuntonan Economico ta anda cu comercio no tur ora ta gana simpatia y aprecio. Por nota un grado di iritacion di parti di e mandatario, mientras cu di otro banda comerciantenan ta sinti mesun cos of pio. No solamente pa e falta di conocemento of comprendemento di e materia, pero e tono/actitud den cual e mandatario ta dirigi su mes na nan. Camara di Comercio no a sconde nan desacuerdo ultimo biaha riba e mesun tema aki, ora cu despues di no a logra nada cu Minister Maduro, a opta pa pidi un audiencia cu su hefe, Minister President Wever, cu pa motibo di biahe a pasa e encargo na Minister Otmar Oduber como Vice Minister Presidente. Den dicho reunion a “by pass” Minister Maduro y a duna comercio 3 luna mas pa haci e cambio aki.

No tin un fecha ainda na Parlamento pa trata e cambio di ley aki. Ayera un delegacion grandi di Parlamento a biaha pa Hulanda pa casi dos siman. Pa awor lo no por spera ningun reunion den Parlamento. Despues ta sigui temporada di reces, pues probablemente ta despues di vakantie lo por spera e ley aki den agenda di Parlamento. Probablemente prome cu esey lo explora si tin sosten politico den seno di Fraccion di MEP, pasobra si Gobierno sinti cu nan no tin sosten riba e tema aki, lo no keda nada otro pa e mesun Minister Maduro sali anuncia cu e no ta aplica e cambio mas por lo pronto, mescos cu el a hay’e forsa ta haci algun dia pasa despues cu su colega di Conseho di Minister a acorda cu comercio cu lo haci dicho cambio.