E aumento di salario minimo aki tabata mas cu husto

Ainda ta sinti for di representante di sector priva, entre otro Camara di Comercio cu un dia pasa tabata tin un critica basta fuerte, contra di e decision di Gobierno pa aumenta salario minimo. Tin biaha no ta sinti un reaccion di Gobierno mes riba esaki. Prome Minister ta conta con Gobierno a reacciona riba un critica asina aki ainda.

El a splica cu e decision pa aumenta e sueldo minimo tabata basa riba e pensamento cu na momento cu bo ta mira cu bo economia ta bay creciendo y tur e perspectivanan ta cu e aña aki ta bay tin un crecemento di 1.5 te cu 3% y e otro aña tambe. E ora ta cuestiona si ta aumenta salario minimo, na momento cu tin inflacion of ta haci e criteria pa aumenta salario minimo uno tambe basa riba con bo ta comparti e prosperidad y crecemento economico den un pais.

Den Europa hopi tempo caba a tuma e decision cu na momento di hiba negociacionnan entre gremionan sindical, gremionan comercial y tambe Gobierno, cu no ta wak inflacion so, pero ta wak tambe ora cu den un aña e economia ta bay crece, con ta duna e empleadonan tambe un parti di e crecemento ey. Anticipando riba e cambionan ey cu ta introduci tambe den nos sistema di salario minimo, Gobierno a manda pidi SER un conseho aña pasa caba y na Januari a haya consehonan cu SER logicamente a bisa cu te ainda e ley ta basa riba e inflacion y practicamente no tabata tin inflacion, cu lo mester cambia e ley pa por crea e posibilidad pa bo por aumenta salario minimo, tambe basa riba e proyeccionnan di crecemento economico.

A tuma e decision e ora, no ta di awo, a wordo ehecuta, door cu el a cana un caminda di ley ya caba na Januari cu ta bay aumenta e salario minimo cu 2.3% y esey a cana su curso cu a haya awe reaccion, pero ta canando caba practicamente for di aña pasa, cu henter e proceso ey a wordo inicia.

E ta forma parti tambe di e filosofia di Gobierno y sigur di e partido cu ta carga e Gobierno aki, cu prosperidad den un pais, mester wordo comparti y ta compronde tin biaha di Comercio cu ta mir’e por ta no a largo tiempo, ta mira e momento directo y ta pensa cu esey ta aumenta nan gastonan di operacion, cu e ta haci tambe. Na e mesun momento, e mesun empleado eynan tambe ta un consumidor. Tambe ta un cliente di hopi comercio na Aruba y cu un poco mas entrada, logicamente e empleado tambe tin mas recurso na su disposicion pa por haci compras pa su famia y con cu tum’e, na cierto momento tambe e tin un impacto pa comercio. Tin biaha ta kere cu por ta comercio ta wak’e hopi directo na e momento eynan y tin biaha tambe por ta e pensamento di con bo ta crea un sistema social economico sostenibel, ta algo toch cu por ta diferente gremio ta wak’e otro.