‘E-Aruba Business Seminar’ a surpasa tur expectativa

Diasabra ultimo a tuma luga ‘E-Aruba Business Seminar’ den Renaissance Convention Center. E sala tabata completamente yen di ehecutivonan di negoshi, specialmente den area di mercadeo, relacionnan publico y tecniconan den e era digital. Tur tabata masha interesa pa cera conoci cu e ultimo dedaroyonan y avansenan den e mundo di tecnologia moderno.

E evento a conta cu oradornan di peso, manera di Microsoft y Uber cu a elabora riba topiconan di social media, mercadeo digital, ‘storytelling’, internet of things, inteligencia artificial y hopi mas.

Hopi compania a forma grupo y asina a sera suficiente hende pa ocupa un mesa completo na e evento. E seminario a resulta di ta un bon forma pa aumenta conocemento di cada empleado y tambe pa crea un mihor ambiente di trabou pafor di trabou mes. Tambe individualnan a atende den grandi, pues tur esunnan cu kier cuminsa un negoshi of ta cuminsando of kizas den futuro lo kier traha den mercadeo.

E oradornan internacional tabata Miri Rodriguez di Microsoft cu a presenta “The good, the bad and the ugly: Do’s and Don’ts on Digital Marketing”. Di e compania UBER for di San Fransisco a bin Mario Vinasco cu a presenta “How to Use Artificial Intelligence for marketing automation”. Andrea Vahl a conta hopi di “Facebook and Instagram Advertising Tactics for Small and Local Businesses”.

E-Aruba tabata un presentacion di Digicel, VCC International cu Payroll Pro, Aruba Airport Authority, Kooyman BV, Aruba Renaissance Resort, CATC, Bold Bizz, Coldwell Banker, Hertz Lease, Click Print y Elite Productions. E produccion tabata den man di Infinity Media Aruba y The Lab.