Corte den Prome Instancia recientemente a huramenta Dwayne Luidens como deurwaarder di impuesto. E huramentacion a tuma luga dilanti Hues. Esaki ta e prome di e tres empleadonan cu a sigui e curso interno na Departamento di Impuesto mes pa bira Belastingdeurwaarder.
E ceremonia importante aki a tuma luga den presencia di Director di Departamento di Impuesto (DIMP), mr. Luenne Gomez-Pieters, famia y algun colega. Despues a sigui cu e felicitacion di e demas coleganan di su seccion.
Un Belastingdeurwaarder ta traha den servicio di Departamento di Impuesto, pues ta un ambtenaar. E ta encarga cu cobransa obligatorio di impuesto. Importante pa subraya cu e Belastingdeurwaarder tin e autoridad, a base di ley, pa haci esaki sin intervencion di un Hues. Despues di manda un “dwangschrift”, e por pone beslag riba cuenta di banco of otro entradanan di un debedo. E por pone beslag tambe riba propiedadnan of propiedadnan inmobil cu lo por wordo bendi den un benta publico.
Na e momento aki Aruba ta conta cu no mas di 9 Belastingdeurwaarder den servicio directo di Departamento di Impuesto. Esey ta menos cu nos isla ruman Corsou, por ehempel, unda tin un total di 26 Belastingdeurwaarder den servicio di Ontvanger der Belastingen. Ta intencion pa recluta mas Belastingdeurwaarder pa DIMP.
