Despues cu Directie Volksgezondheid (DVG) a haci pedido di vacuna di Influenza ya caba mas di un aña pasa, e vacunanan pa motibo fuera di alcanse di DVG a core un
restraso imprevisto. Sinembargo, manera cu a keda sigura na publico recientemente, asina cu e vacunanan yega Aruba, DVG lo anuncia esaki. Durante un conferencia di prensa diaranson mainta, Ichelle Simon Communicatie Adviseur di DVG a informa pueblo di Aruba cu e vacunanan ta yegando nos isla y lo tey pa Diahuebs 14 di December. DVG kier cuminsa duna servicio na comunidad mas liher posibel y ta cla cu un personal capacita pa aplica e vacunanan pa comunidad di Aruba . Pa es rason, Directie Volksgezondheid kier anuncia cu desde diabierna 15 di December 2017, tur persona cu ta cay den un grupo di risico of personanan cu ta desea di ricibi e vacuna por pasa na Departamento di Enfermedadnan Contagioso (DBZ) y busca esaki. Sra. Sharline Koolman di DBZ a informa cu banda di DBZ cu lo duna e servicio aki, lo tin differente punto strategico na unda pueblo lo por pasa pa asina ricibi nan vacuna, e siman nos dilanti. Ta asina cu Dialuna 18 di December, di 9:00 – 11:00 am por pasa na MFA Noord. Diamars 19 di December, di 9:00 – 11:00 am por pasa na MFA Paradera. Diaranson 20 di December, di 9:00 – 11:00 am por pasa na MFA Savaneta. Diahuebs 21 di december, di 9:00 – 11:00 am por pasa na ImSan Sanicolas. Banda di e punto strategiconan aki, DBZ situa na Avicenastraat # 1 tambe lo ta habri for di 8:00 am – 12:00 pm y di 1:00 pa 3:00 pm. Pa loke ta trata e gruponan di risico, esakinan ta personanan mayor di 60 aña, muchanan bou di 2 aña y personanan cu un enfermedad cronico. Aki ta referi na personanan p.e. diabetico, cu presion halto, problema cu higra, riñon y otro. Dr. Wilmer Salazar a aclarea cu e virus di influenza ta un virus respiratorio cu ta afecta e persona y teasta por causa hospitalisacion. Pesey ta importante pa comunidad ta conciente di importancia di tuma e vacuna. Tur e personanan aki por pasa busca nan vacuna completamente gratis. Loke cu si DVG ta pidi ta pa tur persona den e grupo di risico trece carchi di AZV valido. Si bo persona, no ta cay den e grupo di risico, pero si ta desea un vacuna, esaki sin duda lo ta posibel cu un costo adicional di 20 florin. Directie Volksgezondheid ta invita pueblo pa bishita e pagina di facebook di DVG unda tin updatenan regular di temanan tanto di Influenza y temanan importante cu ta regarda salud publico. Si tin cualkier pregunta, por yama Directie Volksgezondheid libremente na 5224200.
