DVG ta anuncia 87 caso positivo nobo

3113

Aunke cu Departamento di Salud tur dia ta duna un update pa loke ta e cifranan, mester bisa cu e cifranan no ta completamente al dia. Y esaki no ta culpa di DVG tampoco.

DVG awe a anuncia cu tin en total 600 caso activo di COVID-19, cual ta 87 caso nobo compara cu e cifranan anterior, esta di un dia prome. DVG ta haya e cifranan di Laboratorio di hospital dos biaha pa dia. E retraso cu tin den e cifranan ta debi na esnan cu mester ricibi for di clinicanan priva cu ta haci e testnan aki tambe.

E cifranan ricibi awe ta mustra cu Aruba tin 717 caso positivo, for di 13 di maart pa awo, di cual 600 ta activo ainda. Di e 717 casonan, 690 ta personanan local y 27 ta bishitantenan. A haci 12982 test di cual y di e 717 testnan positivo, 114 a recupera y e restonan ta activo ainda. Di e 600 casonan activo, 584 ta personanan local y no a menciona ainda si tin persona interna of no.

VACUNA

Mientrastanto awe Rusia a anuncia cu nan a registra e prome vacuna contra coronavirus, desaroya door di Instituto  Gamaleya, cu sede na Moscu. Presidente Vladimir Putin a haci e anuncio aki via di television. El a sigura cu e vacuna a pasa via di e controlnan necesario.

Funcionarionan Ruso a bisa cu e testnan crucial di Fase 3 lo tuma luga despues di e registro estatal di e vacuna.