Dia 10 di october ta dia mundial di Salud Mental. E dia aki ta bin den un temporada caminda nos tur ta sigui consehonan di autoridadnan y simultaneamente ta haci esfuersonan grandi den nos rutina diario pa combati Covid-19. Esaki sigur ta trece cu ne retonan grandi pa cu nos salud mental.
Afortunadamente, tin diferente manera pa nos cuida nos salud mental y yuda otro persona cu tin necesidad di sosten y cuido adicional.
Pa yuda maneha stress y promove bienestar mental ta importante pa mantene un rutina diario. Aki tin algun conseho cu bo por sigui:
Lanta y drumi na e mesun ora tur dia.
Realisa actividadnan placentero, manera un hobby.
Wak programanan cu ta pone bo hari.
Hunga, haci weganan den famia pa fortalece e nucleo familiar.
Come saludabel y na horario regular.
Haci ehercicio regularmente.
Evita uzo di alcohol y droga como forma pa maneha miedo, ansiedad of soledad. Esakinan ta trece mas problema cu solucion.
Den e temporada extraordinario cu nos ta aden, e protocol di “distancia social” ta haci’e dificil pa nos mantene contacto social, cual ta un necesidad cardinal pa nos salud mental.
Esey kiermen cu mester pensa riba maneranan creativo y responsabel pa mantene un cierto contacto social. Por ehempel, uza social media pa promove storianan positivo cu ta desaroya den e seno familiar of mantene encuentro social di maximo 4 persona.
Si ta posibel, ofrece sosten na esnan den necesidad; por ehempel, yuda cu alimento. Apoya y gradici tur esnan cu ta labora pa combati Covid-19.
Estudionan ta mustra cu e personanan cu ta gradici ta sinti menos dolor, menos stress; tin menos problema cu drumimento, tin un sistema inmunologico mas fuerte y ta experiencia relacionnan mas saludabel. Generalmente, practica gratitud ta fortifica salud fisico y mental.
Tambe, si bo ta sinti cu bo mes ta pasando den un momento dificil y no por mas cu e situacion, pidi ayudo; ta ok pa papia. Busca sosten di famia, amigo y/of profesional. No sinti malo pa habri bo mes y expresa bo emocionnan. Papia ta yuda bo resolve bo conflictonan y ta mehora bo salud mental.
Siña maneha stress den un forma saludabel ta haci bo mes, bo sernan keri y nos comunidad mas fuerte.
Pa mas informacion tuma contacto cu Departamento di Salud Publico na 522 4200.
#DVGAruba
#ArubaTaContaCuBo
