Hopi ta e personanan cu ta keha relaciona cu resultadonan cu ta tarda, of resultado robes cu nan ta haya, of e falta di yamada for di DVG na momento cu nan a haya informacion di test positivo. Awe tabatin e testimonio di un ciudadano, kende a keha di e bruhamento den su testnan. E ta haya email cu resultado negativo mientras cu dokter di cas ta papia cu e ta positivo. Y despues nan ta bin control’e.
Den un splicacion ricibi for di un vocero di Departamento di Salud Publico, Jurette Croes, e ta bisa cu DVG no ta haci test di Covid. Esunnan encarga pa esaki ta laboratorio di hospital. Dep di Salud ta solamente haya e resultado pa por maneha e cifranan y haci “contact tracing” y organisa e “task force” isolacion y cuarentena pa sali controla.
E proceso di test ta cuminsa na e dokter di cas unda e pashent ta yama su dokter di cas y ta indica su sintomanan. E dokter di cas ta dicidi si e ta manda e pashent pa test. Laboratorio di hospital ta encarga pa traha cita cu e pashent y haci e test. Den e proceso aki DVG no ta involucra. “DVG no por keda carga culpa di erornan di otro.”
