DVG: Lo investiga ken a manda informacion incorecto pa CDC riba Zika

Ministerio di Salud Publico como tambe dirigentenan di Departamento di Salud Publico a keda asombra diasabra atardi despues di a tuma nota di informacionnan incorecto cu Center for Disease Control CDC a publica recientemente riba nan website. Ey a hisa e nivel di precaucion pa biaheronan di Merca pa Aruba debi na posibel casonan di Zika.

Departamento di Salud Publico Aruba a sigura cu actualmente na Aruba nos no ta experenciando ningun brote di Zika tampoco Dengue ni Chikungunya. E informacion publica pa CDC unda ta duna e impresion aki no ta cuadra cu berdad y un investigacion sigur lo bay wordo haci pa saca afo di unda e informacion eronio aki a sali y tambe mas puntonan incorecto riba nan website.

Ta conoci cu den temporada di yobida Aruba sa confronta casonan di malesanan transmiti pa sangura manera Zika, Dengue y Chikungunya. Pa e motibo aki cu Departamento di Salud Publico tur aña di nobo ta lansa campaña di concientisacion riba prevencion di e malesanan aki pa stimula comunidad pa tuma accion pa preveni cu e sangura por reproduci su mes y plama e malesa.

Personal di Gele Koorts en Muskieten Bestrijding GKMB tambe ta cana cas pa cas y ta haci nan controlnan rutinario na e hotelnan treciendo informacion riba prevencion di criadero anticipando e temporada di yobida.

Comments

comments