DVG: Dos variante peligroso di Coronavirus circulando na Aruba

Rond mundo na e momento aki tin diferente variante di e virus SARS-CoV-2 cu ta ocaciona COVID-19. Kisas bo ta puntra bo mes kico ta un variante? Wel un variante nobo di e virus di SARS-CoV-2 ta sosode na momento cu e virus ta transmiti su mes asina hopi a traves di hende cu e ta cambia su structura of e ta muteer. Esaki ta un proseso normal cu ta sosode cu tur virus y bacteria. Cu otro palabra nan ta adapta nan mes.

Den caso di e virus SARS-CoV-2 cu ta causa COVID-19 no ta diferente, debi na e pandemia mundial masha hopi hende a contagia caba y ainda ta contagiando. Esaki ta haci cu e virus ta cambia continuamente den diferente region di mundo. Tin di e mutacionnan den e virus cu ta insignificante pero tin di e mutacionnan cu ta precupa cientificonan y ta categorisa esakinan como VOC cu ta un ‘variant of concern’ esaki pasobra compara cu e variante di Wuhan China sea e variante nobo ta mas contagioso, mas peligroso of ta afecta no solamente adulto pero tambe mucha.

Na Aruba na e momento aki ta circula dos ‘variant of concern’ cu ta e variante di Reino Uni y tambe e variante di Brazil. Tur dos di e variantenan aki segun experonan ta mas contagioso cu e variante original di Wuhan y esun di Brazil ta mas peligroso tambe.

Esaki ta haci cu den cuidadnan y poblacionnan unda un gran mayoria di persona ainda no tin resistencia contra e virus, por sigui experencia brote di e enfermedad cu cantidad di morto cu ta sigui crece. Si nos para keto y haci un resumen di nos isla Aruba, nos prevalencia pa cu e virus na e momento aki ta unicamente 6.5% di nos poblacion. Esaki nifica cu e mayoria di nos comunidad ainda ta vulnerabel pa e virus aki.

Si nos no sigui cumpli cu tur e medidanan y reglanan vigente, cu presencia di e dos variantenan nobo aki, hopi lihe Aruba por experencia un of mas brote atrobe di casonan di COVID-19. Esaki ta e motibo pakico ta urgi na comunidad pa sigui cumpli cu tur regla y medida di proteccion.

Esunnan den isolacion y cuarentena tambe sigui cumpli debidamente y cuida boso mes y otronan. Hopi importante; na prome indicacion di sintoma di garganta dolor of seco, keintura, nanishi ta core of cansancio; yama bo dokter di cas pa bo haci test. Asina nos ta evita un brote den bo famia of na trabao.

Tambe ta hopi importante pa vacuna, mas lihe e poblacion vacuna, menos hende ta bira malo di Covid-19 y mas lihe Aruba ta recupera. DVG lo sigui monitor e situacion cu e variantenan hopi di cerca.