Tin un protocol vigente riba situacion di COVID-19. No ta Aruba so mester cana e caminda aki, pero rond mundo e mensahe ta igual. Segun Ronald Geerman, enfermero na DVG a delinea kico ta e miho manera pa por pak aan e situacion aki. E protocol ey ta prescribi caba. Nan sa kico pa haci si nan tin un persona, den e caso aki un caso sospechoso.
Si ta un caso sospechoso tambe ta delinea kico ta e criteria cu e dokternan ta mantene si e persona ta cay den e cuadro di sospecho pa coronavirus kico ta pasonan cu nan tin cu tuma y kico ta e medidanan curativo cu nan tin cu haci.
Na momento cu un persona bira malo tuma nota cu tin protocol pa sigui pa bo haya asistencia. Ta hopi importante pa un persona cu si tin problema respiratorio, no bay consultorio di dokter di cas di biaha. Yama bo dokter di cas prome. E dokter di cas lo haci algun pregunta prome pa wak si e ta cuadra cu e criteria pa coronavirus den e caso aki y si e ta cuadra pa e criteria, e dokter lo duna mas instruccion kico pa haci.
Den e caso aki, contacto ta wordo tuma cu salubridad publico. Si ta necesario muestra, testnan ta wordo haci y informacion adicional ta wordo duna na e persona y tambe na famia di kico tin cu haci. Si ta un caso unda tin complicacion, tambe tin palabracionnan caba cu ambulance. Dokternan ta tuma contacto cu servicio di ambulance y nan ta wordo informa ki caso tin pa e personal di ambulance por tuma nan medidanan di precaucion debidamente y tambe di biaha contacto ta wordo estableci cu hospital, cu un persona sospechoso pa coronavirus lo ta na caminda.
Specialista y dokternan di compania tambe tin cu sigui un protocol. Esaki ta pa evita tur situacion por presenta si berdaderamente un persona tin e virus.
E maneho pa evita cu un persona drenta den e consultorio y e chens pa pega mas persona ta real. Mas persona no pega den e consultorio, tin e sistema cu atrobe, un persona cu tin problema respiratorio, yama prome, bisa kico e tin. Atrobe pregunta ta wordo haci na e persona, ta wak si e ta keda cas of bisa cu no, e no ta cuadra cu e caso definitivo pa coronavirus, por bin consulta of nan ta lage na cas. Pero tur cos ta importante pa e persona tuma contacto cu su dokter di compania, sea ta SVB of Medwork prome y no bay consultorio di biaha.
