Segun plan, e di dos ‘batch’ di vacuna marca Pfizer ta yega Aruba diamars dia 9 di maart. Manera a informa caba e di dos ‘batch’ aki lo fungi como di dos dosis pa esunnan cu ya a ricibi nan prome dosis cu ta esunnan trahando den cuido y adultonan mayor 60+.
Manera cu e vacuna yega ta ranca sali dia 10 di maart cu vacunacion di e 12 personahenan cu tawata e promenan cu a ricibi e vacuna dia 17 di maart. Vacunacion di e personahenan lo tuma lugar un bes mas na club Don Bosco na Noord. Riba e dianan 10 y 11 di maart tambe lo ta vacunando e personal di DVG nan di dos dosis.
Dia 11 di maart ta cuminsa cu vacunacion di e personal di Dr Horacio Oduber Hospital esaki lo tuma luga na hospital mes y tambe IMSAN San Nicolas lo ta vacunando nan empleadonan un bes mas.
Pa locual ta dokternan di cas, nan ta programa pa ricibi nan vacuna diasabra 13 di maart na Centro Deportivo Libertador Betico Croes na Santa Cruz.
Si tur cos progresa manera e ta planea, entrante dialuna 15 di maart lo cuminsa cu vacunacion di ciudadanonan cu ya a haya nan prome dosis.
Despues cu cada persona a haya nan prome dosis, mesora a notifica nan di un di dos cita, sea via mail of den nan app na e icon di vacuna. Ta haci un apelacion na esunnan cu a vacuna caba pa bolbe tira un bon bista riba bo di dos cita. Controla e orario y localidad hopi bon.
Ta pidi cooperacion di ciudadanonan pa acudi na e cita segun orario y localidad. Tene cuenta cu ta rond di 11500 hende tin pa vacuna y haci cambio por trece complicacion si hopi hende pidi esaki. Pa esunnan cu tin cita despues di e orario di 5:30 pm, lo reschedule nan den orario normal.
Entrante diamars 9 di maart lo por tuma nota di e orario nobo den e app of via email. Si bo a perde e prome cita pa vacuna pasobra porta a tuma nota di esaki mucho laat, lo haya automaticamente un cita nobo cu tambe lo ta disponibel entrante diamars 9 di maart riba app of via email.
Meta di e di dos rond di vacunacion ta pa keda cla dentro di 2 pa 3 siman pa sigientemente prepara pa yegada di e di tres ‘batch’, programa pa yega den e siman di 29 di maart 2021 y cu lo fungi un bes mas como prome dosis pa demas dunadonan di cuido y adulto mayor 60+.
