Departamento di Salud Publico Aruba (DVG) a informa cu awe tin 96 caso nobo positivo di e 752 testnan di Covid-19 cu a realisa. Manera cu DVG y Hospital ya a informa awe den oranan di mainta, un pashent cu tawata interna den hospital pa condicionnan di salud no relaciona cu Covid-19 a fayece. E persona, a pesar di no a muri a consecuencia di Covid-19, e tabata positivo na momento di su morto y esaki ta haci cu Aruba mester registr’e den su estadistica segun standard internacional di registro di data epidemiologico.
Casonan activo a subi for di 681 ayera pa 776 caso awe. Casonan positivo a subi di 798 pa un total di 894 caso, contando for di e prome dia cu Covid-19 a yega Aruba, dia 13 di maart ultimo. Te cu awe, nos a test 14.804 hende na Aruba, di cual a test 7.081 a test na yegada di pasaheronan na Aeropuerto. E casonan fatal cu tabata 3 for di algun siman caba, awe a subi na 4 morto.
