Diasabra mainta alrededor di 5:00 am polis tabata presenta na Lekker Bar pa su orario di cierre. No ta cu e negoshi no tabata cumpliendo sino mas bien pa sigura cu tur cos cana sin ningun problema. A dura por lo menos trinta minuut prome cu tur hende a bandona e sitio. Mientras cu polis tabata para pafo di Lekker, un Mitsubishi Lancer colo shinishi a pasa por lo menos cinco pa seis biaha, locual a lanta sospecha. No un, sino cinco patruya a bay su tras pa controla e auto mirando cu ta trata di un conoci di polis. Den e auto tabatin e chauffeur y un pasahero. A confisca un ski mask colo preto, cu mayoria biaha atracadonan sa uza pa tira atraco y un bat di hero. A para e auto den e area di Washington.
Un rato despues, algo prome cu 6:00 am a drenta informacion cu a mira e hendenan den e mesun auto aki cu un supuesto arma di candela. Varios unidad di polis a presenta na parkeerplaats di New Wei Tai na Palm Beach caminda a tuma nota di e hombernan. A controla tur hende cu tabata eybou, pero no a topa cu e arma di candela. A busca den mondi rond pero sin resultado. Ta un cuchiu (arma blanco) a topa cu ne den mondi tira. Na final e chauffeur a sigui su caminda despues di un control basta pisa. Polis ta basta atento mirando e cantidad di caso di tiramento cu ta tumando luga riba nos isla, practicamente for di control.
