Duo indocumenta deteni despues di control

Diasabra marduga alrededor di 12:55 am polis a duna chauffeur di un auto marca Toyota modelo Yaris color cora, numera A-12896 señal pa para na altura di Centro di Bario Playa Pabou. E chauffeur sea no a ripara of a purba core pa polis cu velocidad halto. Polis a sigui su tras y na altura di Wan Li Supermarket cerca di rotonde Driemasterstraat a logra par’e.

Tabatin dos persona den e auto. Ora e agentenan a acerca nan, nan comportacion tabata uno hopi nervioso y sospechoso. For di prome instante caba e polisnan a sospecha cu nan ta indocumenta riba nos isla. Asina mes a sigui cu e procedura normal y puntra nan pa un identificacion valido. Tanto e chauffeur como e pasahero na ningun momento por a demostra un.

Dos persona indocumenta deteni: Un tin seis y e otro cuater aña riba nos isla y no tin permiso valido

Posted by 24ora on Friday, November 11, 2022

Nan a conta yen storia. Supuestamente un tin seis aña riba nos isla y e otro tin cuatro. E auto no ta di nan. Nan no tin rijbewijs valido tampoco. Nan ta para fuerte cu nan tin permiso pa ta riba nos isla pero no por a demostr’e. Bou sospecho di ta indocumenta riba nos isla, a detene nan y transporta nan pa warda di polis caminda lo traspasa nan pa Guarda Nos Costa kende lo sigui cu e proceso di deportacion.