Dump na Parkietenbos na candela atrobe

0
893

Un rato pasa habitantenan di Parkietenbos, Buena Vista, Simeon Antonio y Bucutiweg a raporta cu dump ta na candela atrobe. E biaha aki tabata scucha explosionnan constante riba e landfill, indicando cu artefactonan peligroso lo por ta kimando eyriba. Bisiñanan ta teme pa e peliger aki, tanto pa nan siguridad pero specialmente pa nan salud.

Ta birando normal caba cu cada tanto dia ta bolbe pega e dump na candela. Sea su mes ta pega na candela of antisocialnan ta peg’e na candela pa malo. Nan lo no tin e minimo idea di e peliger cu nan ta expiendo nan mes na dje, sin lubida e peliger constante pa e barionan cerca di e dump.

Esaki ta por lo menos un di e motibonan cu e fundacion di habitantenan di e bario ta boga pa cera e dump y bin cu un solucion permanente. Den pasado a menciona incinerator como un posibel solucion, aunke esey no ta carga mucho sosten den comunidad. Hecho ta cu investigacionnan haci ta indica cu pa hopi decada a dump tur sorto di desperdicio na e sitio, cu ta dificil pa saca afo kico tur tin dera bou di e sero di sushi eynan.