Adolf (Dufi) Kock a haci un bishita na Arubahuis despues di a ricibi un Zilveren Anjer di Prins Bernhard Cultuurfonds. E condecoracion a keda otorga na Paleis op de Dam door di Princesa Beatrix den presencia di Gobernador di Aruba Alfonso Boekhoudt, Minister Plenipotenciario Guillfred Besaril, Representante di Aruba na Union Europeo y Minister Plenipotenciario Suplente Juan Ady Thijsen, esposa Maria Kock, famia y amigonan di Dufi Kock.
Dufi Kock a ricibi e premio aki pa su conocemento grandi di e historia di Aruba. Cu su conocemento y su coleccion di 1 miyon di potret desde 1800 te cu awe, Kock a duna un contribucion significante pa preserva nos herencia cultural. Dufi Kock ta como “selfmade man” di balor grandi pa su conciudadano. Cu su amor pa su isla y su historia e ta inspira tur dia su prohimo, di cual hopi hoben.
Minister Besaril a felicita Dufi Kock cu e condecoracion aki y a bisa cu Aruba ta masha orguyoso cu Prins Bernhard Cultuurfonds pa a balora e trabao di sr. Dufi Kock. Tamba tabata tin oportunidad pa directora a.i. Glenda Hernandez y personal di Arubahuis a felicita Dufi Kock y señora Maria Kock cu e Zilveren Anjer.
