Probechando cu nos ta den pleno vacacion escolar varios di nos atletanan ta biahando pa exterior unda nan ta participa den un of mas competencia y/of campeonato di deporte.
E hoben atletanan prospecto den e deporte di BMX, Dudley Ras y Davey Croes bou guia di coach Pedro Estaba lo competi den e campeonato mundial di BMX cu lo tuma lugar na Rocky Hill, Merca e dianan 22 pa 29 di juli proximo. Pa ambos atleta e competencia aki lo sirbi como nan preparacion pa e Weganan Sur Americano Hubenil den luna di september proximo. Tambe na mesun momento e ta sirbi pa evalua e nivel di tur e competidornan y e diferente seleccionnan cu lo competi den e Weganan Sur Americano Hubenil na Chile. Den pasado tur dos atleta a competi pa Aruba den campeonatonan internacional, pues nan tin e experencia. Mas cu claro e campeonato mundial aki ta un bon momento pa demostra cu Aruba tin bin coredor di bike cross cu por bataya mei mei di e grandinan.
Na e mesun momento un representante di Aruba Wielerbond, Sr.Gerald Rasmijn lo atende e Congreso di UCI BMX na Rocky Hill unda lo papia riba e ultimo desaroyonan di e deporte di bike cross na nivel mundial. Un danki na Lotto, e loteria di Aruba cu pa medio di Comision di Subsidio cu a yuda subsidia e biahe di e atletanan di BMX pa e competencia di UCI BMX na Rocky Hill y di e representante di AWB pa cu e Congreso di UCI BMX. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio