Departamento di Aduana ta bay tin un songfestival di Vallenato, dia 31 di augustus cuminsando pa 7’or y mey. Ta algo cu Aduana ta bezig ta organisando pa bay den exterior. Tur aña ta celebr’e diferente caminda, sea na Corsou, Boneiro, etc.
Segun Janice Croes, commies eerste klas, e evento aki di songfestival ta pa recauda fondo pa por sigui cu e celebracion. Dos aña pasa a haci un festival di ranchera y e biaha aki a haci Vallenato. Pero tur biaha e ta cambia, Croes a indica.
E festival lo tuma luga na Centro di Bario Noord y carchinan ta obtenibel na e oficina principal di Aduana, banda di Da Drogesterij. Tambe cerca Croes mes yamando na 7312231. Of por cumpra ticket di entrada na Jona’s Snack na Pos Chikito y naturalmente cerca e participantenan.
Un total di 21 Duanero lo participa den e festival aki. Croes a indica cu nan a atende cinco training y a trek lot. E participantenan ta hopi entusiasma. Ta bay tin dos categoria, A y B. Categoria A ta mas profesional y categoria B ta pa esnan cu nunca a canta. Pa loke ta e banda, Edwin Benitez di Vallenato VIP ta compaña e participantenan.
Pueblo di Aruba, pa bin apoya e participantenan y engrandece e festival diasabra awo. Croes ta manda un palabra di gradicimento na tur esnan cu a participa den preparacion di e festival. Cada un di nan a pone nan esfuerso pa e festival aki por bay door.
