Sindicato SADA awe mainta a habri siman cu un accion na Aeropuerto. Edward Maduro, Presidente di SADA a bisa cu directiva di Cuerpo di Aduana a informa nan cu a bin ordo di Minister mr. Xiomara Ruiz-Maduro pa corta den “overtime” y un di e areanan ta e trahamento di warda di marduga na aeropuerto.
Den pasado a purba kita e warda ey caba pero no a logra, pasobra e Duaneronan no tabata kier.
SADA a bisa di ta compronde e punto di bista di Gobierno, esta cu Aeropuerto ta cera marduga, pues no tin vuelo. Pero, e trabou di Aduana no ta unicamente pa cobra impuesto sino tambe pa controla nos fronteranan. Nan ta tene cuenta cu e situacion na Venezuela, pues ta insisti cu mester sigui vigila Aeropuerto, hasta marduga.
Di otro banda, e mesun warda di 12:00am pa 8:00am no tin Polis presente ni personal di Migracion tampoco. Ambos ta traha “piket” pues si tin un vuelo, nan lo percura pa tin hende pa procesa e vuelo ey, como excepcion.
SADA a sigura awe cu e simpel warda ey no por ta e motibo di tanto overtime den Cuerpo di Aduana, pa cual a haci un apelacion na Minister Xiomara Ruiz-Maduro pa reconsidera su decision.
For di Aruba Airport Authority nos a compronde cu e hefenan di Aduana mes a traha awe durante e accion, pues e operacion a sigui. E accion como tal no tabatin consecuencia pa e vuelonan drenta y/of saliendo for di Aeropuerto.
