Cuerpo di Aduana di Aruba, Corsou, St. Maarten y Hulanda (tambe den nomber di islanan BES) lo firma e acuerdo durante e Convencion di Duana di Caribe hunto cu 8 pais, cu ta tuma luga na Cuba, dia 22 di Mei. Desde e momento ey, e paisnan aki lo forma e nucleo di un organisacion internacional nobo, e Organisacion di Duana di Caribe.
Esaki ta un di e asociacionnan di cooperacion Duanero mas importante cu ta inclui e paisnan di Caribe Hulandes.
E tratado di Duana ta permiti e paisnan cu firma e tratado pa intercambia informacion riba productonan di miho manera, mas lihe y di forma automatico. Esey lo permiti e Duaneronan pa calcula e control di bienes (fisico) cu mayor precision deseabel of necesario. Di e manera aki por preveni fraude miho y por ehempel, contrabanda di droga.
Ta precisamente den Caribe, cu a bin ta un region di transito di droga durante varios decada, cu esaki ta di gran importancia pa e paisnan afecta.
E tratado a wordo negosha durante hopi tempo. Desde 2003 Hulanda a tuma e iniciativa pa ehecuta e tratado. E tratado ta firma pa Cuba, Antigua, Republica Dominicana, Bahamas, e cinco teritorionan Britanico den Caribe (manera Cayman Islands y Bermuda) Aruba, Corsou, St. Maarten y Hulanda. Ta spera cu e otro paisnan di Caribe, manera Mexico y Jamaica, tambe firma den e proximo lunanan. Esaki lo ta posibel te cu dia 1 di Januari 2020.
E Secretario di Estado di finansas Menno Snel: “Ta hopi importante cu e paisnan di e region aki traha hunto di manera mas intenso y miho. Hopi droga intercepta na Hulanda finalmente ta yega na e area aki. Door di establece e organisacion aki di Duana di Caribe, awo nos por aborda e problema aki for di su raiz.”
