Awendia Aruba tin un doctorado den Papiamento, kende ta drs. Joyce L. Pereira. El a haci su doctorado na University of Curaçao, unda cu el a defende su tesis (thesis) “Valorization of Papiamento in Aruban society and education, in historical, contemporary and future perspectives”.
Hunto cu Biblioteca Nacional, drs. Pereira a tene un anochi di presentacion di su buki pero tambe a papia con el a defende su tesis. E anochi aki hopi hende a presenta pa asina scucha con drs. Pereira a yega na e topico y pa crea e buki aki.
A conta cu 3 orador di cual dr. Liesbeth Echteld y profesor dr. Ronnie Severing a papia riba e thesis di drs. Pereira, mientras cu drs. Pereira mes a conta con el a yega na su thesis y kico tur por haya den e buki.
Drs. Pereira tabata un docente y tambe ta duna charla den Caribe over di Papiamento. El a dicidi cu e kier bay haya su doctorado y como cu no ta duna esaki na Aruba, mester a bay haci’e na Corsou. E trayecto pa haya su doctorado tabata uno hopi interesante. E mester a haci test prome pa por a bira un candidato pa bay studia pa su doctorado. Desde 2011 el a cuminsa haci investigacion pa su doctorado y a logra esaki na 2018.
Durante su trayecto el a investiga con Papiamento a cuminsa mester a bay bek den historia, unda cu ta bisa tur cos a cuminsa door di diferente idioma. E no a bin cu niun teoria nobo, pero a haci uzo di esunnan cu tin caba riba e origen di papiamento. El a logra tur esaki cu guianan for di docentenan di Corsou, pero tambe door di haci diferente pregunta di investigacion pa Aruba. Parti di e investigacion el a acerca diferente gruponan di docente, mayornan y hobennan pa haci preguntanan con nan ta haya cu ta duna les di Papiamento na scol. Tambe el a uza diferente documento pa su investigacion, bayendo den documentonan cu el a haya na Archivo Nacional, Biblioteca Nacional.
Despues cu el a haya su doctorado, drs. Pereira a dicidi di skirbi un buki over di su tesis y kico tur el a haya. Tambe den e buki e ta pone con e historia di Papiamento a inicia cual e idioma ta bin di esclavitud y con el a desaroya na loke nos tin awendia. Na final di anochi a celebra esaki cu un brindis, unda a gradici tur persona cu a presenta, tambe algun invitado a tuma e oportunidad aki pa cumpra e buki di drs. Joyce Pereira.
